Astronom

En Astronom ass an der Reegel eng akadeemesch ausgebilt Persoun, déi sech wëssenschaftlech mat der Astronomie beschäftegt.

Haaptaktivitéit vun den Astronomen

Wann een de Begrëff Astronom op déi Wëssenschaftler beschränkt, déi sech haaptberufflech mat der Astronomie beschäftegen, da gehéiere meeschtens zwou vun de follgenden Aktivitéiten zum Beruff:

• wëssenschaftlech Fuerschung um Gebitt Astronomie, besonnesch an der Astrophysik, Astrometrie, Kosmologie oder am Beräich vun de Planéitesystemer respektiv der Raumfaart, souwuel am visuelle wéi am theoreetesche Beräich.
• Enseignant op enger Universitéit als Universitéitsprofesser oder -assistent.
• Entwécklung vu Moossinstrumenter oder Computerprogrammer.
• Leedung an / oder Verwaltung vun Institutioune fir d'Fuerschung an d'Entwécklung, respektiv vu grousse Projeten - wéi bei der ESA oder NASA.

De Beruff vum Fachastronom setzt normalerweis en Héichschoulstudium an der Astronomie oder an änlechen Naturwëssenschafte viraus, wéi en Diplom an der Physik oder Astronomie (nëmmen an Ëisträich), munnechmol och an der Mathematik, Geodesie, Aeronautik an aneren. D'Verfaasse vun enger Dissertatioun schléisst sech an de meeschte Fäll un, déi ofgeschlosse Promotioun gëllt dacks als Viraussetzung fir eng Aarbechtsplaz ze kréien.

Verännert Beruffsbild

D'Beruffsbild vun den Astronomen huet sech an de leschte Joerzéngte staark verännert. An der Vergaangenheet hunn d'Astronomen den Himmel haaptsächlech mat opteschen Teleskopen am Observatoire observéiert. Haut schaffen déi meescht a ganz spezialiséierte Froestellungen a wäerten elektromagnéitesch Signaler an alle Wellelängtenberäicher aus - vun der kuerzwelliger Gammastralung bis zu de längste Radiowellen.

Dofir sëtzen d'Astronomen haut net méi "hanner dem Teleskop", mä nëmmen e kuerzen Deel vun hirer Zäit an de Kontrollraim vun den Teleskopen. Déi do notéiert Date ginn an der reschtlecher Zäit doheem um Schreifdësch ausgewäert a verschafft.

Fach- an Amateurastronomen

Well d'Astronomie wéi ëmmer nach eng Wëssenschaft ass, déi och am professionelle Beräich vun Eenzelen a vu klenge Fuerschungsgruppe markéiert ass, hunn och Amateure mat entspriechender Begabung an Ausrëschtung d'Méiglechkeet fir matzeschaffen. Amateure sinn dacks do erfollegräich, wou eng stänneg Observatioun noutwenneg ass, awer wéinst den héije Käschte vun de Groussteleskope kaum professionell ze maachen ass, wéi z. B. d'Asteroiden- a Koméiteniwwerwaachung oder um Gebitt vu verännerleche Stären an der Astrometrie.

Kuckt och

Lëscht vun Astronomen

Um Spaweck

Commons: Astronomen – Biller, Videoen oder Audiodateien