Allee zu Munneref

D'Allee zu Munneref, ass eng Allee mat Neelchesbierebeem (Pyrus pyraster, (fr) poirier sauvage européen, (de) Wildbirne oder Holzbirne) déi tëscht Munneref an Éimereng stinn an déi wéinst dem Gesamtandrock vun der Allee zënter 2002 zu de bemierkenswäerte Beem zu Lëtzebuerg gehéieren.

Allee zu Munneref
D'Allee am August 2013
Kategorie	Bemierkenswäert Beem zu Lëtzebuerg, Allee
Land	Lëtzebuerg
Gemeng	Munneref, Schengen
Koordinaten	49°30'6,95"N, 6°17'46,18"O
Bamaart	Neelchesbierbam
Status	Zousazinventaire vun de klasséierte Monumenter
Héicht	10,33 m (2023)
Duerchmiesser	0,50 m (2023)
Ëmfang	1,57 m (2023)

Allee zu Munneref

Lag vun der bemierkenswäerter Allee

D'Allee gouf 2001 als Zousazinventaire op der Lëscht vun de klasséierte Monumenter klasséiert.

Lokalisatioun

D'Allee ass den éischten Deel vun der Strooss, déi vun der Résidence Monplaisir zu Munneref an der Gemeng mam selwechten Numm op Éimereng an der Gemeng Schenge féiert. Si zitt sech iwwer d'Lieu-dite Kickeschpand an op Kirelheck, a besteet aus ronn 200 Bierebeem, deenen hire geneeën Alter net bekannt ass.

D'Allee ass 1,3 km laang. Kuerz viru Mëttlängt, vu Munneref aus gesinn, béit se bal rechtwénkeleg no riets a Richtung Éimereng of. D'Strooss ass fräi fir de Verkéier, gëtt awer well se schmuel ass, kaum nach benotzt.

Geographesch Koordinate vum Ufank a vum Enn vun der Allee:

• Munneref: 49° 30’ 17.16’’ N 06° 17’ 22.15’’ O
• Éimereng: 49° 29’ 43.21’’ N 06° 17’ 36.40’’ O

Geschicht

Dem Lokalhistoriker Lé Tanson (1914 – 1999) vu Munneref no, wier d'Allee op d'Initiativ vum Munnerëffer Paschtouer Théodore Flammang ugeluecht ginn. Fir dat Nëtzlecht mat deem Agreabelen ze verbannen, wieren d'Beem engersäits gesat gi fir de Kuergäscht déi op Munneref an de Bad koumen den Openthalt ze verschéineren an anersäits fir aus de Bieren eng Neelchesdrëpp ze brennen. Zu där Zäit haten d'Uebstbeem laanscht d'Stroossen en net onwichtege wirtschaftleche Wäert an d'Bauerwaltung huet d'Friichten am Hierscht ëffentlech verkaaft.

Entwécklung

2008 konnt ee gesinn, datt eng ganz Rëtsch vun de Beem aus Altersgrënn net méi an engem gudden Zoustand waren. 2007/2008 goufen der vill vun hinne staark zeréckgeschnidden. Anerer goufen ewechgeholl an duerch jonk Beem ersat.

Ongeféier Moosse vum Bam (m)

Joer	$U$	$d$	$h$
2000	2,32	0,74	15,00
2023	1,57	0,50	10,33

$U$ = Ëmfang; $d$ = Duerchmiesser; $h$ = Héicht

Biller

• D'Allee zu Munneref am Laf vum Joer
• 
  Fréijoer (Mee 2008)
• 
  Summer (Juni 2008)
• 
  Hierscht ()
• 
  Wanter ()

Kuckt och

• Aner bemierkenswäert Beem zu Munneref (am Park vum Hotel Grand-Chef):

eng Platan an e männlechen an e weibleche Ginkgo

• Bemierkenswäert Beem zu Lëtzebuerg
• Lëscht vun den nationale Monumenter an der Gemeng Munneref

Literatur

• Murat, D. & M. Feldtrauer-Molitor (Koordinatioun), 2023. Les arbres remarquables du Grand-Duché de Luxembourg. Editeuren: Administration de la nature et des forêts (ANF) an natur&ëmwelt asbl. ISBN 978-2-9199474-3-0 (cf. S. 190-191, Foto an Text)
• Bartimes, Mett et al. Les arbres remarquables 2002. Luxembourg: Administration des eaux et forêts, 2002. Print. ISBN 2-919877-05-4 (cf. S. 222-223, Foto an Text)
• Arbres remarquables du Grand-Duché de Luxembourg. Luxembourg: Administration des eaux et forêts, 1981. Print.

Um Spaweck

Commons: Allee zu Munneref – Biller, Videoen oder Audiodateien