Westdäitschland
De Begrëff Westdäitschland ass meeschtens politesch gemengt a bezeechent dann de westlechen Deel vun Däitschland (d'Bundesrepublik Däitschland), dee bis 1990 politesch an ideologesch vum ëstlechen Deel (déi Däitsch Demokratesch Republik; DDR) getrennt war. Geographesch gëtt de Begrëff manner gebraucht an ass och méi schwéier ofzegrenzen.
![](http://upload.wikimedia.org/wikipedia/commons/thumb/a/a9/Deutschland_Bundeslaender_1957.png/220px-Deutschland_Bundeslaender_1957.png)
De Begrëff Westdäitschland gouf politesch zënter 1945 gebraucht, fir déi dräi Westzonen ze bezeechnen, deemno déi US-amerikanesch, déi brittesch an déi franséisch Besatzungszonen, respektiv, wéi déi 1949 gegrënnt gouf, d'Bundesrepublik Däitschland.
Dës huet sech virun 1990 zesummegesat aus de Bundeslänner Schleswig-Holstein, Hamburg, Bremen an Niedersachsen, Nordrhein-Westfalen, Hessen, Rheinland-Pfalz, dem Saarland (no sengem Bäitrëtt 1957), Baden-Württemberg a Bayern. Baden, Württemberg-Baden a Württemberg-Hohenzollern haten 1952 zu Baden-Württemberg fusionéiert. 1990 sinn d'Länner aus der DDR duerch den Däitschen Eenegungstraité der Bundesrepublik bäigetrueden, an d'DDR gouf opgeléist.
Zënterhir gouf dacks, besonnesch an engem sozio-ekonomesche Kontext, vum virege Westdäitschland als den "ale" Bundeslänner geschwat, wann et drëm goung, Ënnerscheeder zu deenen aus der fréierer DDR ("den neie Bundeslänner") ze definéieren; mä dëse Gebrauch ass, 25 Joer no der Erëmvereenegung, lues a lues am Verschwannen.