Schëld C, 2

Schëld C, 2
	Fuerverbuet a béide Richtungen
Bezeechnung	C, 2
Kategorie	Verkéiersverbuetsschëld
Land	Lëtzebuerg
ageféiert	23. November 1955

D'Schëld C, 2 ass e Verkéiersverbuetsschëld aus dem Lëtzebuerger Code de la route dat de Chauffere vu Gefierer an de Leit déi Déiere féieren ugëtt, datt et aus deenen zwou Richtunge verbueden ass an d'Strooss eranzefueren, mat Ausnam vun de Leit déi do wunnen an deenen hire Liwweranten.

Am allgemenge lëtzebuergesche Sproochgebrauch gëtt dat Schëld "Verbuede Strooss" genannt.

Originaltext aus dem Code de la route

„2. Circulation interdite dans les deux sens - Le signal C,2 indique que l'accès est interdit dans les deux sens aux conducteurs de véhicules et d'animaux, à l'exception des riverains et de leurs fournisseurs“

– Artikel 107 – III. Signaux d'interdiction et de restriction^[1]

Bemierkungen

D'Schëld C, 2 gehéiert zu de Schëlter déi 1955 an der éischter Versioun vum Code de la route agefouert goufen; et war deemools ënnert der Nummer 24 vum Artikel 107 definéiert^[2].
Wann een dëst Verbuetsschëld net respektéiert, riskéiert een e Pretekoll vu 74 Euro (awer kee Verloscht vu Punkte vum Punktefürerschäin)^[3].

Spezialfäll

Verschidde Stroosse sinn am Wanter mam Schëld C,2 mat dem Zousaz (fr) "en cas d'enneigement et de verglas" gezeechent. An deem Fall däerf ee "bei Schnéi an Äis" net duerchfueren. D'Stroossen déi ënnert dëst Verbuet falen, sinn an engem ministerielle Reglement opgezielt^[4]^,^[5].