Prostatt

D'Prostatt oder Prostate (laténgesche Fachbegrëff: Prostata) ass eng exokrinn Drüs am Kierper vun de männleche Mamendéieren. Si produzéiert e Sekret (d'Prostatt-Sekret), dat een Deel vum Sperma ass.

Lokalisatioun vun der Prostatt am Kierper vum Mann (op Englesch).

Si läit beim Mann ënnert a bei den Déieren hannert der Harnblos an ëmschléisst den Ufank vun der Harnröre. Op der Récksäit grenzt s'un de Rektum; dofir ka se do och mat de Fangeren ertaascht a beurteelt ginn, an am sexuelle Kontext op deem Wee duerch eng Massage stimuléiert ginn.

Beim jonke Mann gläicht si an der Gréisst an an der Form enger Käscht, mee mam Alter ka se méi grouss ginn.^,,

Anatomesch gëtt d'Prostatt an dräi Läppercher (lobus prostatae dexter, lobus prostatae sinister, a lobus prostatae medius) ënnerdeelt an an den isthmus prostatae, enger Bréck aus Tissu.

D'Entwécklung an d'Funktioun vun der Prostatt ginn duerch männlech Hormoner wéi dem Testosteron beaflosst, déi an den Hode gebilt ginn. Si reguléieren de Wuesstem vun der Prostatt an d'Bildung vun der Prostatteflëssegkeet. Beim Urinéieren spillt d'Prostatt keng Roll, mee wéinst hirer Positioun am Kierper ka si op d'Harnröre drécke wa se méi grouss gëtt, an da Schwieregkeete beim Waasserloosse provozéieren.

Nieft der Produktioun vu hirem Sekret ass d'Prostatt och eng Aart Muskelkomplex, dee wärend der Erektioun, respektiv wärend der Ejakulatioun, d'Harnröre um Ausgang vun der Blos blockéiert, fir ze verhënneren datt d'Ejakulat sech mat dem Urin vermëscht a sech esou negativ op d'Befruchtung auswierkt.

Bei de Frae ginn d'Paraurethraldrüsen heiansdo als "weiblech Prostatt" bezeechent.

Zu Lëtzebuerg war 2022 Prostatt-Kriibs mat 443 neie Fäll déi am wäitste verbreet Kriibserkrankung bei de Männer, virun dem Longekriibs (210 nei Fäll) an dem Daarmkriibs (177 nei Fäll).

Kuckt och

• Hormonsystem
• Geschlechtsorganer beim Mann

Commons: Prostatten – Biller, Videoen oder Audiodateien