Muse (Museksgrupp)

Muse
Muse
Museksgenre	Rockmusek, Progressive Rock, Symphonic Rock, Hard Rock, Alternative Rock, Alternative Metal
Land	Vereenegt Kinnekräich
Grënnung	1994
Websäit	muse.mu
Memberen	Matthew Bellamy (Gesank, Leadgittar, Piano, Synthesizer); Dominic Howard (Batterie); Christopher Wolstenholme (Bass, Piano, Rhythmusgittar, Mondharmonika, Hannergrondgesank)

Muse ass eng englesch Rockgrupp, déi 1994 gegrënnt gouf.

Geschicht

Muse gouf a Südengland an der klenger Uertschaft Teignmouth gegrënnt, wou déi dräi Museker sech kennegeléiert hunn. Den Dominic Howard an de Matthew Bellamy hu sech scho vun hirer vireger Band Gothic Plague hier kannt.

Si hunn duerno zesumme mam Christopher Wolstenholme d'Band Rocket Baby Dolls gegrënnt, déi spéider a Muse ëmgedeeft gouf. Hir éischt Optrëtter hate si an engem Boxring, deen hinnen an hirem Lycée als Bün gedéngt huet. Spéider hu si als Muse d'EP'en Muse (1998) a Muscle Museum (1999) erausbruecht, déi e relativ grousse Succès haten.

Uganks 1999 gounge si zeréck an de Studio fir Showbiz opzehuelen. Domat ass Muse grouss erauskomm a si sinn op hir éischt Welttournée gaangen. No dëser laanger Tournée gounge si zeréck an de Studio fir Origin of Symmetry (2001) opzehuelen. Bei hire Studiosopname waren ëmmer grouss Produzente bedeelegt, déi och scho fir Pink Floyd a Radiohead un de Reegler souzen. Dësen Album, dee gelueft gouf fir säi bombastesche Klang, huet Muse definitiv ob den Zenit vun de Rockbands bruecht.

Den Album Absolution (2003) gouf méi vu klassescher Musek beaflosst, mat Sträichinstrumenter op Lidder wéi Butterflies and Hurricanes, a war den éischte vun hire siwen Albumen, déi et noeneen op déi éischt Plaz an de brittesche Musekscharts gepackt hunn.

Op Black Holes and Revelations (2006) goufe méi Elementer aus der elektronescher Musek an der Popmusek agebonnen, wéi dat ënner anerem bei dem Extrait Supermassive Black Hole ze héieren ass, an huet der Band weidere weltwäite Succès bruecht. Op den Albumen The Resistance (2009) an The 2nd Law (2012) huet Muse d'Theme vun der Ënnerdréckung duerch d'Regierung a Biergeropstand exploréiert. Hir Tournéeën hunn och hire Status als eng vun de Bands, déi déi bescht Stadiumsconcerte ginn, weider zementéiert.

De siwente Studioalbum vu Muse mam Titel Drones (2015) huet et op déi éischte Plaz vun den US-amerikaneschen Albumcharts gepackt. Et ass e Konzeptalbum iwwer Krichsféierunge mat Hëllef vun Dronen a bréngt e méi haarde Rocksound zeréck. Dogéint stinn um aachte Studioalbum Simulation Theory (2018) éischter d'Synthesizer am Vierdergrond. En ass vun der Science-Fiction an der Simulatiounshypothees inspiréiert.

Den Album Will of the People, dee vill Genren an Theme vun hire fréieren Albumen kombinéiert, koum 2022 eraus.

Muse huet eng sëllege Musekspräisser gewonnen, dorënner two Grammy Awards, zwee Brit Awards, a fënnef MTV Europe Music Awards.

Verschiddenes

MUSE, 2010 zu Melbourne an Australien.

Den däitschen MTV Moderator Markus Kavka sot eng Kéier iwwer Muse si wieren déi eenzeg Band, bei där een de Sänger net kéint vun der E-Gittar ënnerscheeden.
All d'Muse-Membere ware scho mat 12 Joer an enger Band.
De Christopher Wolstenholme huet am Ufank Batterie gespillt an ass duerno eréischt op de Bass gewiesselt.

Discographie

Studioalbumen

1999: Showbiz
2001: Origin of Symmetry
2003: Absolution
2006: Black Holes And Revelations
2009: The Resistance
2012: The 2nd Law
2015: Drones
2018: Simulation Theory
2022: Will of the People

Livealbumen

2008: HAARP
2013: Live at Rome Olympic Stadium

Single-Auskopplungen (Auswiel)

1999: Uno
1999: Cave
1999: Muscle Museum
2000: Sunburn
2000: Unintended
2001: Plug In Baby
2001: New Born
2001: Bliss
2001: Hyper Music / Feeling Good
2002: Dead Star / In Your World
2003: Time Is Running Out
2003: Hysteria
2004: Sing for Absolution
2004: Butterflies and Hurricanes
2006: Supermassive Black Hole
2006: Starlight
2006: Knights of Cydonia
2009: Uprising
2009: Undisclosed Desires
2010: Neutron Star Collision (Love Is Forever)
2012: Survival
2012: Madness
2013: Supremacy
2015: Dead Inside
2015: Mercy
2016: Reapers
2017: Dig Down
2018: Thought Contagion
2018: Something Human
2022: Won't Stand Down

Um Spaweck

Commons: Muse – Biller, Videoen oder Audiodateien

Offiziell Säit vu Muse