Conrotseck

Conrotseck
	De Conrotseck (2013)
Land	Lëtzebuerg
Adress	Eck Krautmaart/Rue du Palais de Justice
Koordinaten	49° 36’ 42.6’’ N 6° 07’ 56.3’’ O
Architekt(en)	Pierre Funck
Statut	Klasséiert Monument (INPA)

De Conrotseck ass en Eckgebai an der Uewerstad an der Stad Lëtzebuerg, um Eck vum Krautmaart an der rue du Palais de Justice.

Historesches

De Léon Conrot, e Geschäftsmann an Associé vun der Duchfabréck op der Polvermillen^[1], huet 1897 no de Pläng vum Pierre Funck eng „nei“ Fassad am Neo-Renaissance-Stil baue gelooss; de Conrot wollt, datt säin Haus tëscht den Haiser rondrëm sollt erausstiechen.

De Conrotseck (ëm 1900)

D'Gebai steet zanter dem 30. November 1989 op der Lëscht vum Inventaire supplémentaire vun de klasséierte Monumenter.^[2]

Gebai

De markanten Erkertuerm sollt un den deemolege Regierungspalais erënneren, deen haitege Groussherzogleche Palais.

An der Fassad war eng Auer agebaut, déi drun erënnere sollt, datt d'Zäit a privat a berufflech Deeler opgedeelt gëtt. Och den Numm vum Proprietär „Conrot-Lenoël“ war op der Fassad, ënnert der Auer, ze gesinn; allebéid goufe se méi spéit awer ewechgeholl.

Op der säitlecher Fassad vum Haus ass eng Pietà mat engem Sockel, op deem d'Joer 1570 agravéiert ass; donieft steet den Numm vum Architekt deen d'Fassad vun 1897 geplangt huet, Pierre Funck.

Ier d'Gebai 1934 vun der Banque générale du Luxembourg (haut BGL BNP Paribas) kaaft gouf, waren eng Mercerie^[3] an e Spillbuttek dran etabléiert. An den 1950er Jore war um 2. Stack eng Stéckerei^[4].

Uganks vun den 1990er Joren ass d'Gebai komplett renovéiert an entkäert ginn, eenzeg d'Fassad ass ursprénglech^[5], allerdéngs, wéi de Verglach vun enger aler Foto mat enger rezenter beweist, ëm eng Fënster no riets erweidert (op "Käschte" vum Nopeschhaus).