Christian Weis

De Christian Weis, gebuer den 22. Februar 1986 zu Lëtzebuerg, ass e lëtzebuergesche Politiker (CSV).

Christian Weis
Den Escher Buergermeeschter Christian Weis (Januar 2024)
Gebuer	22. Februar 1986
Nationalitéit	Lëtzebuerg
Educatioun	Haute École Louvain en Hainaut, Universitéit vu Léiwen
Aktivitéit	Assistant social, Politiker
Partei	CSV
Fonctioun	Buergermeeschter

Liewen a Karriär

De Christian Weis huet vun 2006 un op der Haute école Louvain en Hainaut studéiert an 2009 e Bachelor als Assistant social gemaach. Duerno war hien op der Universitéit vu Léiwen an huet säi Studium an de Politikwëssenschafte mat engem Master ofgeschloss.

Hien huet vun 2015 bis Enn 2023 als Sozialaarbechter beim Roude Kräiz a war vun 2018 bis 2020 Dozent op der Uni Lëtzebuerg am Fach „bachelor en sciences sociales et éducatives“.

2016 ass de Christian Weis an den Escher Gemengerot nogeréckelt an 2017 gouf hien direkt op der Lëscht vun der CSV an de Gemengerot vun der Stad Esch-Uelzecht gewielt. Am September 2020 gouf hien, wéi am Koalitiounsaccord vun der CSV-DP-déi gréng-Koalitioun virgesinn, Schäffen amplaz vun der Mandy Ragni (Déi Gréng).

Bei de Gemengewale vum 11. Juni 2023 gouf hien als Zweeten op der Lëscht vun der CSV, mat 3.657 Stëmmen, an den Escher Gemengerot erëmgewielt a gouf nees Schäffen.

Nodeems de Georges Mischo de 17. November 2023 Minister an der Regierung Frieden-Bettel gouf, an dofir d'Escher Buergermeeschteschplaz huet missen opginn, gouf de Christian Weis den 29. November 2023 vum Gemengerot zum neie Buergermeeschter vun Esch-Uelzecht gewielt, an de 7. Dezember 2023 vereedegt.

Am Dezember 2023 huet de Christian Weis och d'Presidence vum Verwaltungsrot vum Centre Hospitalier Emile Mayrisch (CHEM) iwwerholl an Ufank 2024 ass hien zum President vum Gemenge-Syndikat PRO-Sud gewielt ginn.

Zanter Mäerz 2024 ass hien och Vize-President vun der CSV.

Kuckt och

• Lëscht vun de Buergermeeschtere vun Esch-Uelzecht