Centres de gériatrie
Centres de gériatrie war den Numm vun engem ëffentlechen Etablissement zu Lëtzebuerg dat vum 23. Dezember 1998 bis den 22. Dezember 2000 funktionéiert huet.
Duerch e Gesetz vum 23. Dezember 1998 goufen zwee ëffentlech Etablissementer gegrënnt an zwar:
- D'Centres, foyers et services pour personnes âgées ënner der Tutelle vum Familljeministère, an
- d'Centres de gériatrie ënner der Tutelle vum Gesondheetsministère.
D'Centres de gériatrie haten als Missioun fir Empfanksstrukturen, fir al Persounen déi ofhängeg vun Drëtte sinn, oder geronto-psychiatresch ofhängeg sinn, ze kreéieren oder z'iwwerhuelen.[1].
Fir dat kënnen ze maachen, huet Centres de gériatrie d'Gestioun vun de Fleegeheemer vun Iechternach, Esch-Uelzecht, Déifferdeng a Veianen iwwerholl. Gläichzäiteg hu se och d'Gestioun vun de Proprietéite vun deenen Heemer iwwerholl.[2]
Duerch d'Gesetz vum 22. Dezember 2000 gouf Centres de gériatrie an d'Centres, foyers et services pour personnes âgées integréiert, woubäi eng Restrukturéierung vu verschiddene Proprietéite gemaach gouf.[3].