Arabesch Liga

D'Arabesch Liga (op Arabesch: الجامعة العربية‎), offiziell Liga vun den Arabesche Staten (جامعة الدول العربية Dschāmiʿat ad-Duwal al-ʿArabiyya) ass eng regional Organisatioun aus arabesche Länner an a rondrëm Nordafrika, d'Har vun Afrika a Südwestasien. Si gouf den 22. Mäerz 1945 zu Kairo vum Kinnekräich Egypten, dem Kinnekräich Irak, Transjordanien, dem Libanon, Saudi-Arabien a Syrien gegrënnt. Jemen ass de 5. Mee 1945 derbäikomm. Momentan huet d'Liga 22 Memberstaten, obwuel déi syresch Participatioun wéinst der Repressioun duerch d'Regierung am aktuelle Biergerkrich zënter November 2011 ausgesat ass. (Stand: Januar 2015)

Fändel vun der Arabescher Liga

D'Haaptzil vun der Organisatioun ass et d'"Relatioun tëscht de Memberstate méi enk ze maachen an d'Kollaboratioun tëscht hinnen ze koordinéieren, fir hir Onofhängegkeet an hir Souveränitéit ze sécheren an op eng generell Manéier d'Affairen an d'Interesse vun den arabesche Länner ze konsideréieren".

Mat Institutioune wéi der Arabescher Organisatioun fir Erzéiung, Kultur a Wëssenschaft an dem Wirtschafts- a Sozialrot vum Rot fir Arabesch Wirtschaftseenheet facilitéiert d'Arabesch Liga politesch, wirtschaftlech, kulturell, wëssenschaftlech a sozial Programmer déi d'Interesse vun der arabescher Welt promovéiere sollen. D'Liga ass och e Forum an deem d'Memberstaten hir politesch Positioune koordinéieren an iwwer aktuell Theemen debattéieren, an an deem scho verschidden arabesch Streidereie geléist gi sinn a Konfliker limitéiert goufen. D'Liga ass och d'Plattform op där vill bedeitend Dokumenter iwwer wirtschaftlech Integratioun ausgeschafft goufen.

All Memberstat huet nëmmen ee Vote am Rot vun der Arabescher Liga, mä nëmmen déi Staten, déi gestëmmt hunn, sinn un d'Decisioune gebonnen.

Memberstaten

D'Memberstate vun der Arabescher Liga (gréng)

Memberstaten (mat dem Bäitrëttsjoer respektiv der Memberschaftsperiod):

• Algerien (zënter 1962)
• Bahrain (zënter 1971)
• Dschibuti (zënter 1977)
• Egypten (1945-1979, zënter 1989)
• Irak (zënter 1945)
• Jemen (Südjemen: zënter 1945; Nordjemen: zënter 1967; Vereenegt: 1990)
• Jordanien (zënter 1945)
• Katar (zënter 1971)
• Komoren (zënter 1993)
• Kuwait (zënter 1961)
• Libanon (zënter 1945)
• Libyen (zënter 1953-2011, zënter 2011)¹
• Marokko (zënter 1958)
• Mauretanien (zënter 1973)
• Oman (zënter 1971)
• Palestina (zënter 1976)
• Saudi-Arabien (zënter 1945)
• Somalia (zënter 1974)²
• Sudan (zënter 1956)³
• Syrien (zënter 1945-2011, zënter 2013)⁴
• Tunesien (zënter 1958)
• Vereenegt Arabesch Emirater (zënter 1971)

¹ D'Memberschaft vu Libye gouf wéinst dem Stuerz vun der Regierung zäitweis ausgesat.
² Somaliland huet 1991 eng eesäiteg Onofhängegkeet ausgeruff an ass de facto en eegene Stat, gëtt awer weiderhin zu Somalia gezielt.
³ Zënter der Onofhängegkeet vum 9. Juli 2011 ouni de Südsudan
⁴ 2011 gouf Syrien als Memberstat suspendéiert. Zënter dem 26. Mäerz 2013 hält déi Syresch Nationalkoalitioun déi Memberschaft. D'Regierung vum Baschar al-Assad gëtt vun der Arabescher Liga net méi als legitim Vertriedung vum arabesche Vollek ugesinn.