Aire de Wasserbillig

Aire de Wasserbillig ass den Numm vun enger Koppel Raschtplaze mat Bensinnsstatioun op der lëtzebuergescher Autobunn A1, nërdlech vu Waasserbëlleg an der Gemeng Mäertert a westlech vum däitsche Laser.

Virum Akraafttriede vun de Schengener Accorde war den Terrain e Grenzposte mat engem Douanesbüro; déi deemoleg Gebaier sinn hautdesdaags deels an de Komplex vun der Raschtplaz integréiert ginn.

Waasserbëlleg-Nord

Geographesch Koordinaten:

49° 43’ 42.0’’ N 06° 29’ 26.9’’ O

D'Raschtplaz Waasserbëlleg-Nord ((fr) Aire de Wasserbillig-Nord) läit um KP 35,50 tëscht der Sauerdallbréck an dem Viaduc iwwer d'Sernigerbaach an der Richtung fir an d'Stad Lëtzebuerg. D'Ausfaart Waasserbëlleg (N° 15) leeft laanscht den nërdleche Bord vun der Raschtplaz a stéisst südwestlech dovun op den CR141B.

D'Bensinnsstatioun gëtt vun TotalEnergies exploitéiert. Op der Raschtplaz gëtt et eng Cafeteria vun „Café Bonjour“.

Waasserbëlleg-Süd

Geographesch Koordinaten:

49° 43’ 37.5’’ N 06° 29’ 30.8’’ O

An der Richtung fir op Tréier läit d'Raschtplaz Waasserbëlleg-Süd ((fr) Aire de Wasserbillig-Sud) e knappe Kilometer virun der däitscher Grenz um KP 35,50. Se läit nërdlech vum Park-and-Ride Miesenech an nërdlech vun der Ausfaart Waasserbëlleg (N° 15). Ëstlech laanscht d'Raschtplaz leeft d'Opfaart Waasserbëlleg fir a Richtung Däitschland ze fueren.

D'Bensinnsstatioun gëtt vun TotalEnergies exploitéiert. De Restaurant Burger King deen zënter 2011 do besteet, war den éischte Restaurant deen d'Fast-Food-Chaîne zu Lëtzebuerg opgemaach hat.

Zukunftspläng

D'Gemeng Mäertert plangt fir hire PAP ëmz'ännere fir datt se d'Méiglechkeet kréien d'Terraine ronderëm d'Aire de Wasserbillig ëmzeklasséieren an esou e Pôle d'échange kënnen ze schafen.

Kuckt och

• Tanktourismus

Um Spaweck

Commons: Aire de Wasserbillig – Biller, Videoen oder Audiodateien