Wikipedia:Copyright

Maintenance

Initiativen

Vandalismus

Wonschlëschten

Copyright

Fotoen a Graphiken

Hëllefsmëttel

D'Zil vun der Wikipedia ass et fir all Mënsch gratis Accès ze ginn op eng grouss Informatiounsquell am Format vun enger Enzyklopedie. Dës Publicatioun an all Weiderbenotzung vu Contenu doraus muss am legale Kader geschéien, notamment an deem vun den Auteursrechter.

An der Praxis bedeit dat, datt et verbueden ass op d'Wikipedia Contenu ze setzen, deen ee soss anzwousch fonnt huet, ausser den Auteur vun deem Contenu hätt dat ausdrécklech erlaabt an enger Form déi mat der Wikipedia kompatibel ass. Am Prinzip soll een also just eegene Contenu op d'Wikipedia setzen.

Wann der wëllt Contenu vu Wikipedia benotzen an ärem eegene Buch, Artikel, Website oder an enger anerer Publicatioun, da musst der d'Lizenzbestëmmunge vu Wikipedia respektéieren.

Lizenzbestëmmunge fir Texter

Wéi an de Benotzungsbedingunge vun der Wikimedia Foundation zanter Juni 2009 beschriwwen, ënnerleien all d'Texter vun der Wikipedia op Lëtzebuergesch der Creative Commons-Lizenz Nummnennung - Weidergab ënner gläiche Bedingungen 3.0 (unported) (lëtz. Versioun) an aus Kompatibilitéitsgrënn och weider nach der GFDL.

Weiderbenotzer däerfen aus deene genannte Lizenzen eng auswielen, ënner där se Wikipedia-Text weidergebrauchen. Dës Lizenzen erlaben och eng kommerziell Benotzung, soulaang se d'Lizenzbestëmmunge respektéieren.

Creative Commons

D'Lizenz CC-BY-SA 3.0 verlaangt ë. a. déi follgend Konditioune fir Wikipedia-Texter:

Nummnennung (BY attribution): Fir e Wikipedia-Text ënner iergend enger Form ze gebrauchen, musst der d'Auteure vun deem Text ernimmen. Dëst maacht der andeems der entweder a) en zitéierfäege Link setzt (ze fanne lénks an der Geschirkëscht vun all Artikel) oder d'URL ugitt vun der oder deene Säiten déi der gebraucht, oder b) eis Zitéierhëllef gebraucht, oder c) eng Lëscht vun allen Auteuren ugitt.

Weidergab ënner deene selwechte Bedingungen (SA share alike): Är Dokumenter op Basis vu Wikipedia-Texter musse selwer och ënner der CC-BY-SA 3.0 Lizenz verëffentlecht ginn. Dowéinst musst der an ären Dokumenter eng Referenz op dës Lizenz uginn. Dëst maacht der andeems der entweder a) e Link oder eng URL op den Text vun der Lizenz ugitt (also: http://creativecommons.org/licenses/by-sa/3.0/), oder b) eng integral Kopie vun der Lizenz lokal zougänglech maacht oder bei äert Dokument dobäileet.

Changementer uginn: Wann der e Wikipedia-Text net am Original gebraucht mä e verännert ier de e reproduzéiert, da musst der op eng raisonnabel Aart a Weis uginn datt d'Original verännert gouf. Wann der z. B. e Wikipedia-Text op är eege Wiki eriwwergeholl hutt, dat geet et duer fir dëst am Versiounshistorique vun der Säit unzeginn.

GFDL

All Text dee virum 15. Juni 2009 op der Wiki publizéiert gouf stoung nëmmen ënner der GNU Free Documentation License (GFDL). Wann der also am Historique vun engem Artikel eng Versioun auswielt vu virun deem Datum, dann applizéiert sech just d'GFDL, wann der eng Versioun vun duerno oder déi aktuell Versioun auswielt, dann hutt der wéi gesot am Prinzip de Choix tëscht GFDL a Creative Commons.

D'GFDL erlaabt et, Artikel vu Wikipedia och entzwuesch anescht ze benotzen. Dobäi mussen allerdéngs d'Lizenzbedingunge vun der GFDL beuecht ginn. Als Dokument am Sënn vun der Lizenz gëllt all Artikel eenzel (also net Wikipedia als e Ganzt).

Permission is granted to copy, distribute and/or modify this document under the terms of the GNU Free Documentation License, Version 1.2 or any later version published by the Free Software Foundation; with no Invariant Sections, with no Front-Cover Texts, and with no Back-Cover Texts.

A copy of the license is included in the section entitled "GNU Free Documentation License".

D'Lizenz staamt ursprénglech aus dem US-amerikanesche Recht a gouf fir Softwaredokumentatiounen opgestallt an net fir e Projet wéi Wikipedia. D'Mataarbechter vu Wikipedia hunn dofir un allgemenge Richtlinne geschafft wat d'Benotzung vum Wikipedia-Contenu ugeet. Follgend Bestëmmungen hunn dee Moment keng Kraaft viru Geriicht a sinn temporär. Am Zweifelsfall gëllt d'GFDL-Lizenz.

Beuecht wgl. datt d'Anhale vun der GFDL-Lizenz iech net vun anere Rechter entbënnt, besonnesch deene vun der Wikimedia Foundatioun um Numm Wikipedia. Vermeit wgl. alles wat zu enger Verwiesslung tëscht ärer Homepage a Wikipedia féiere kéint.

Onverännert Kopien

Eenzel Artikelen oder de komplette Contenu vu Wikipedia duerf fir Print- oder Onlinerepublikatioune benotzt ginn. Dobäi sollt der den zweeten Abschnitt vun der GFDL beuechten. Dobäi muss eng vollstänneg Kopie gemaach ginn, also och den Historique mat den Nimm vun den diversen Auteuren.

Liest heizou och: http://en.wikipedia.org/wiki/wikipedia:verbatim_copying

Ännerungen

Ginn Deeler vum Artikel geännert, sou sief op den Abschnitt 4 vun der GFDL opmierksam gemaach. Folgendes muss dobäi erfëllt sinn:

déi verännert Versioun muss erëm ënner der GFDL lizenséiert sinn
et muss op den Original higewise ginn
den Zougank zu enger "transparent copy" muss méiglech sinn

Praktesch Uwennung fir Online-Medien

Am Fall vun enger online Verbreedung vum Wikipedia Contenu besteet en informellt "Gentlemen-Agreement": An der Reegel sinn d'Auteuren domat averstane wa follgende Saz an all kopéierten Artikel geschriwwe gëtt:

Dësen Artikel baséiert um Artikel "XYZ" aus der fräier Enzyklopedie Wikipedia a steet ënner der GNU Free Documentation / CC-BY-SA 3.0 Lizenz. Op Wikipedia ass eng Lëscht vun den Auteure verfügbar, do kann een den Artikel och änneren.

"Wikipedia" sollt en direkte Link op d'lëtzebuergesch Haaptsäit hunn, "XYZ" en direkte Link op de spezifeschen Artikel, "Lëscht vun den Auteuren" op d'Versiounslëscht vum Artikel, "änneren" op d'Editéier-Fënster vum Artikel an d'"GNU Free Documentation" respektiv "CC-BY-SA 3.0 Lizenz" sollt op eng lokal Kopie vun der jeeweileger Lizenz linken.

Lizenzbestëmmunge fir Mediefichieren

Fir Mediefichieren (z. B. Biller, Videoen, Tounfichieren) gëllen dacks aner Lizenzbestëmmungen. Dës muss een eenzel op deene jeeweilege Beschreiwungssäiten nokucken ier een sou e Fichier gebraucht.

Natierlech sinn déi applikabel Lizenzbestëmmungen dee Moment och ze respektéieren. Dacks ass de Gebrauch vun engem Bild un d'Konditioun gebonnen, datt op d'mannst den Auteur genannt gëtt an datt d'Bild ënner der selwechter Lizenz weidergebraucht gëtt. Opgepasst, et gëtt op der Wikipedia op Lëtzebuergesch och Biller mat méi restriktive Lizenzen déi de Gebrauch a verschiddene Jurisdiktioune net oder just ageschränkt erlaben.

Violatioun vu Lizenzbestëmmungen

Wann der festgestallt hutt, datt en Text oder e Mediefichier vun äech ouni är Autorisatioun op d'Wikipedia eropgeluede gouf, da schreift är Doléance op d'Diskussiounssäit vun deem betraffenen Artikel oder Mediefichier, wa méiglech mat kloren Indicatioune firwat ärer Meenung no dat Eroplueden net an der Rei war. En Admin wäert sech da beméien, sech där Affär sou séier wéi méiglech unzehuelen, an de betraffen Text oder Mediefichier direkt läsche wann der Recht hutt.

Wann der selwer Lizenzbestëmmunge vu Wikipedia-Texter oder Wikipedia-Mediefichiere mëssuecht hutt, da bréngt dat w.e.g op d'mannst fir d'Zukunft an d'Rei, andeems der déi uewe genannte Bedingunge korrekt ëmsetzt. Wann der dat net sollt maachen, mä och ganz allgemeng, behalen d'Wikimedia Foundatioun an déi eenzel concernéiert Auteure sech d'Recht vir, fir all néideg Schrëtt dogéint ze ënnerhuelen, dorënner och d'Recht fir viru Geriicht géint äech virzegoen.