Fënneft Republik

D'Fënneft Republik (fr: Cinquième République) ass de republikanesche Regime, deen a Frankräich zanter dem 5. Oktober 1958 a Kraaft ass. Si ass d'Nofollgerin vun der Véierter Republik, déi 1946 agefouert gi war.

Geschicht

Wéi de Charles de Gaulle den 1. Juni 1958 Président du Conseil gouf, huet hien eng Ekipp ënner der Leedung vum Michel Debré op d'Bee gesat fir e Projet fir eng nei Constitutioun auszeschaffen. Dee Projet gouf den 28. September 1958 iwwer e Referendum ugeholl a gouf d'Constitutioun vum 4. Oktober 1958, och nach Constitutioun vun der Fënnefter Republik genannt.

D'Institutioune vun der Fënnefter Republik si sou ausgeriicht, datt de President am Prinzip op eng zolidd Majoritéit an der Assemblée nationale ziele kann. Et goung dem Charles de Gaulle drëms, d'Klengkréimerei vun de (ville) Parteien z'ëmgoen an d'politesch Onstabilitéit, déi di Véiert Republik besonnesch staark markéiert hat, am Kontext vum kale Krich, vun der Dekolonisatioun a vun der europäescher Integratioun z'iwwerwannen.

Et ass awer munnechmol anescht komm, wéi erhofft, an de President, deen net méi op eng eege Majoritéit am Parlament ziele konnt, huet eng feindlech Regierung missen zouloossen an asetzen. Sou Fäll gi Cohabitatioun genannt. Et gouf där bis elo dräi an der Zäit vun der Fënnefter Republik, zwou ënner dem François Mitterrand an eng ënner dem Jacques Chirac.

Bis 2002 war d'Mandatsdauer vum Presidentenamt 7 Joer. Vun do u gëtt de President zanter der konstitutioneller Reform aus dem Joer 2000 nëmmen nach fir 5 Joer gewielt an en däerf eemol zeréckgewielt ginn.

Presidente vun der Fënnefter Republik

Numm	Liewen	Mandat
Charles de Gaulle	1890-1970	1959-1969
Alain Poher (interim)	1909-1996	1969
Georges Pompidou	1911-1974	1969-1974
Alain Poher (interim)	1909-1996	1974
Valéry Giscard d'Estaing	1926-	1974-1981
François Mitterrand	1916-1996	1981-1995
Jacques Chirac	1932-	1995-2007
Nicolas Sarkozy	1955-	2007-2012
François Hollande	1954-	2012-2017
Emmanuel Macron	1977-	2017 -haut

• 
  Charles de Gaulle
  President
  vum 8. Januar 1959
  bis den 28. Abrëll 1969.
• 
  Georges Pompidou
  President
  vum 20. Juni 1969
  bis den 2. Abrëll 1974.
• 
  Valéry Giscard d'Estaing
  President
  vum 27. Mee 1974
  bis den 21. Mee 1981.
• 
  François Mitterrand
  President
  vum 21. Mee 1981
  bis de 17. Mee 1995.

• 
  Jacques Chirac
  President
  vum 17. Mee 1995
  bis de 16. Mee 2007.
• 
  Nicolas Sarkozy
  President
  vum 16. Mee 2007
  bis de 15. Mee 2012.
• 
  François Hollande
  President
  vum 15. Mee 2012
  bis de 14. Mee 2017.
• 
  Emmanuel Macron
  President
  zanter dem
  14. Mee 2017.

Literatur

• Alain Duhamel, Une histoire personnelle de la Ve République; Paräis (Plon), 2014.
• Édouard Balladur & Alain Duhamel, Grandeur, déclin et destin de la Ve République - Un dialogue; Paräis (Éditions de l'Observatoire), 2017.