Tunnel Stafelter

Geographesch Koordinaten:

49° 39’ 32.9’’ N 6° 10’ 25.8’’ O

Den Tunnel Stafelter ass en Autobunnstunnel op der lëtzebuergescher Autobunn A7 deen ënner engem Deel vum Gréngewald erduerch geet. Säin Numm huet e vum Stafelter, deem héchste Punkt iwwer sengem Tracé.

Um Heeschdrëferbierg, Ausgank vum Tunnel Stafelter, a Richtung Norde gekuckt (2018).

Déi selwecht Vue, wärend dem Bau (2014).

E besteet aus zwéi Réier mat enger Längt vu jee 1.850 Meter, déi an enger Déift tëscht 3 m an 20 m haaptsächlech an de Lëtzebuerger Sandstee gegruewe sinn.

Dee südlechen Agank ass um hallwe Wee tëscht dem Waldhaff an der Brennerei, nieft der N11, deen nërdlechen am Mägrond um Plateau vum Heeschdrëferbierg. Op enger Längt vu 700 m, tëscht dem Stafelter an dem Lieu-dit Doudeg Fra, leeft den Tracé, deen déi ganzen Zäit riicht aus geet, genee ënner dem CR126.

Den 18. Februar 2009 hunn d'Aarbechten um Tunnel ugefaangen. Den 22. Abrëll 2010 war den Duerchstéch vum Süd-Nord-Rouer, dee vum Nord-Süd-Rouer war ee Mount duerno.

Och wann d'Aarbechten um Tunnel schonn éischter fäerdeg waren, goung en awer eréischt den 23. September 2015, zesumme mam Tunnel Grouft an dem leschten Deelstéck vun der Nordstrooss op. D'Baukäschte vum Tunnel, ouni d'Sécherheetsariichtungen, leie bei ronn 100 Mio. Euro.

Biller

• 
  Den Nordagank vum Tunnel Stafelter am Februar 2014.
• 
  De Sécherheetsausgank vum Tunnel um Stafelter

Kuckt och

• Lëscht vun de Stroossentunnellen zu Lëtzebuerg

Um Spaweck

Commons: Tunnel Stafelter – Biller, Videoen oder Audiodateien

• Broschür Tunnel Stafelter - Percement, Ministère du Développement durable et des Infrastructures, 2010
• Affiche Tunnel Stafelter - Das Rohrschirmsystem, Ministère du Développement durable et des Infrastructures, 2011
• Tunnel Stafelter op der Websäit vun de Ponts et Chaussées