Thérèse Frégnac
D'Thérèse Marguerite Marie Louise Heuertz-Frégnac, gebuer den 21. Juni 1907 zu Roubaix a gestuerwen den 12. August 1972 an der Stad Lëtzebuerg, war eng franséisch-lëtzebuergesch Molerin[1].
| Thérèse Frégnac | |
|---|---|
| Gebuer |
21. Juni 1907 Roubaix |
| Gestuerwen | 12. August 1972 |
| Nationalitéit | Frankräich |
| Aktivitéit | Moler |
| Famill | |
| Bestuet mat | Marcel Heuertz |
| Geschwëster | Solange Frégnac |
 | |
D'Thérèse Frégnac gouf a Frankräich als Duechter vum Wollhändler Auguste Léon Frégnac an der Sidonie Marie Joseph Dervaux gebuer[2], si war d'kleng Schwëster vun der Solange Frégnac. Si huet op der École nationale supérieure des arts et industries textiles an hirer Heemechtsstad studéiert.
D'Thérèse Frégnac huet sech zu enger Blummemolerin entwéckelt. 1937 hunn d'Frégnac-Schwësteren an der Galerie Bradtké an der Stad Lëtzebuerg ausgestallt. D' Thérèse huet zwanzeg Blummebiller gewisen, d'Solange eng véierzeg Landschaften, Stadlandschaften an eng Rei Blummemolereien[3]. D'Regierung huet d'Biller Le lac de Gerardmer (Solange) an Nature morte (Thérèse) opkaaft, an d'Stad Esch d'Wierk Le port de St.-Tropez vun der Solange. 1938 huet d'Frégnac sech mam Naturwëssenschaftler Marcel Heuertz (1904–1981) bestuet, deen deemools am Kolléisch enseignéiert huet. Méi spéit war hie President vun der Société des naturalistes luxembourgeois (1955-1962) an Direkter vum Staatsmusée (1964-1969). Duerch d'Bestietnes krut d'Frégnac d'Lëtzebuerger Nationalitéit. Si huet weider hiren eegenen Numm fir hir Molerei benotzt.
D'Thérèse an d'Solange Frégnac hunn nom Zweete Weltkrich allebéid an de Salone vum Cercle artistique de Luxembourg ausgestallt. 1950 hat d'Thérèse Frégnac eng Solo-Ausstellung an der Galerie Bradtké, wouduerch d'Rezensentin vum Escher Tageblatt geschriwwen huet: "Si weess nach ëmmer, wéi ee Blumme mat sensibelen Ae kuckt a se beweegt duerstellt. Et stëmmt, datt si kaum déi gewinnt Margréidercher, Neelchesblummen, Mimosaen, Peonien, Chrysanthemen an dräifaarweg Bouquete moolt; ma léiwer méi "aristokratesch", méi raffinéiert Blumme wéi Tigerlilien, Orchideeën, Amaryllissen a Callas, "[4]. Hir Wierker sinn ënner anerem Deel vun der Sammlung vum Nationalmusée fir Archeologie, Geschicht a Konscht.[5]
D'Thérèse Heuertz-Frégnac ass am Alter vu 65 Joer an der Stad Lëtzebuerg gestuerwen, si gouf zu Iechternach begruewen.
Referenzen änneren
- ↑ Jos Welter, red. (1993) Rétrospective : Cent ans d'art luxembourgeois 1893-1993. Letzebuerg: Cercle artistique de Luxembourg / Crauthem: Lux-Print. ISBN 2-919970-24-0.
- ↑ Gebuertsschäin 1907, n° 1447.
- ↑ "Vernissage de l'Exposition Solange Frégnac", Luxembourg (1935), 4. Oktober 1937; "Kunstausstellung Solange und Therese Frégnac in Luxemburg", Obermosel-Zeitung, 8. Oktober 1937.
- ↑ (fr) Joseph-Emile, "L'Exposition de Mme Thérèse Frégnac", Escher Tageblatt, 9. Dezember 1950.
- ↑ Lambert Herr (1992) Anthologie des arts au Luxembourg. Luxemburg: Editions Emile Borschette. ISBN 2-87982-034-0. s. 101-102.