Jaipur

Jaipur (Hindi: जयपुर - Jayapur) ass eng Stad am indesche Bundessaat Rajasthan. Si huet ronn 3 Milliounen Awunner.

Jaipur
Land	Indien
Awunner	3.073.350 (2011)
Fläch	467 km²
Koordinaten	26°55'N, 75°52'O
Telefonszon	141
Postcode	302001
Websäit	http://jaipurmc.org/

Jaipur ass eng Industriestad, déi séier wiisst, mat Metall-, Textil-, Schmuck- a cheemescher Industrie; an hirer Ëmgéigend ginn et Biergbau a Landwirtschaft.

Se läit ronn 300 Kilometer südwestlech vun Delhi, 200 Kilometer westlech vun Agra an 180 Kilometer nordwestlech vum Ranthambhore-Nationalpark.

D'Stad ass e kulturellen Zentrum, mat enger Universitéit, Theateren, Kinoen, Muséeën, engem Zoo a Konschtmonumenter. Si ass e Verkéiersknuet am Stroossen- an Eisebunnsreseau an huet e Fluchhafen. D'Alstad, bannent enger aler Stadmauer, gouf 2019 op d'Lëscht vun den UNESCO-Weltierfschaften opgeholl.

Geschicht

D'Stad gouf de 17. November 1727 vum Maharadscha Jai Singh II. (1686–1743) als nei Haaptstad vum Fürstestaat Jaipur gegrënnt an no de Prinzipie vun der Shilpa Shastra gebaut. Wéinst der eenheetlech rosrouder Faarf vun de Gebaier aus Sandsteen an der Alstad gëtt Jaipur "Pink City" genannt.

No der Onofhängegkeet vun Indien vu Groussbritannien, de 15. August 1947, ass de Staat Jaipur 1949 mat de Fürstestaaten Bikaner, Jodhpur a Jaisalmer zum Rajasthan fusionéiert, a Jaipur gouf deem seng Haaptsad. 2008 koum et zu enger terroristescher Attack, mat ronn 60 Doudesaffer.

De Stadpalais mam Hawa Mahal an de Jantar Mantar-Observatoire zielen zu de kuckeswäerte Gebaier an der Stad.

Biller

• 
  Hawa Mahal
• 
  De Stadpalais vum Jai Singh II.
• 
  Jaipur vum Fort Nahargarh aus

Literatur

• Gerrit Bretzler,Jaipur – Studien zur Stadt- und Sozial-Geografie einer indischen Großstadt, Universität Bochum, Abteilung Geowissenschaften, Dissertation 1970

Kuckt och

• Lëscht vun de Weltierwen (Asien an Ozeanien)

Um Spaweck

Commons: Jaipur – Biller, Videoen oder Audiodateien

• Jaipur City, Rajasthan op unesco.org
• [http://www.jaipurmc.org/ Website vun der Municipal Corporation Jaipur