De Faschismus ass eng politesch Ideologie, déi op eng extreem Aart a Weis an der konter-revolutionärer Beweegung 1919 bis 1922, a spéider ënner der Diktatur vum Benito Mussolini, an Italie Fouss faasst.

Hir Unhänger gi Faschiste genannt.

De réimesche fascis

D'Symbol war den alréimesche "fascis", eng Gaarf Rudden, an där e Beil mat agebonne war, als Zeeche vun der Muecht a vum Recht ze bestrofen.

Als Regierungsform, déi souwuel autoritär, pyramidal opgebaut ("Führerprinzip", eng eenzeg Massepartei) an och sozial oder "völkesch" orientéiert war/ass, ass de Faschismus totalitär a prinzipiell och imperialistesch: hie beherrscht eleng, duerch déi eenzeg zougeloosse (faschistesch) Partei, déi dem "Duce" (Führer, op Däitsch) total ënnerworf ass, dat ganzt politescht, sozio-ekonomescht, kulturellt an edukativt Liewe vun der Gesellschaft, identifizéiert sech absolut mam Staat, kontrolléiert eleng sämtlech polizeilech a militäresch Institutiounen a versicht un déi alréimesch Gréisst duerch ë. a. d'Erweiderung vum Kolonialräich unzeknäppen (Libyen, Eritrea, Somalia, Äthiopien). Dobäi spillen eng gewësse pseudo-reliéis Mystik, d'Militariséierung vun der Gesellschaft a besonnesch d'Gewalt eng wichteg Roll.

De Faschismus léisst keng aner politesch Bewegungen oder Parteien zou. Hien ass weder "lénks" nach "riets", mee ganz eleng, eben totalitär, angeblech am Déngscht vun alle Membere vun der Volléksgemeinschaft. A wien net matmécht, gëtt als Feind betruecht a verfollegt.

Regimmen, déi nach méi extrem sinn, wéi z. B. den Nationalsozialismus, deen op d'Virherrschaft vun enger "Rass" an op d'Versklavung oder Zerstéierung vun anere "Rasse" setzt, weisen zwar all Charakteristike vum Faschismus op, mä, well se awer nach méi extrem sinn, solle se roueg mat hirem eegenen Numm bezeechent ginn: Nationalsozialismus.

Aner Regimmen, déi zwar zäitweileg eventuell mam Faschismus, respektiv mam Nazi-Regimm zesummegeschafft hunn, ouni awer rassistesch oder imperialistesch ze sinn, wéi z. B. déi nationalistesch-konservativ an antirepublikanesch Beweegung ënner dem Franco während dem spuenische Biergerkrich, a spéider ënnert dem Franco senger Diktatur, sollen och nëmmen ënnert hirem richtegen Numm erwähnt ginn, eeben als Frankismus, soss riskéiert een de Faschismus onnéideg ze banaliséieren.

Um SpaweckÄnneren

Commons: Faschismus – Biller, Videoen oder Audiodateien

Kuckt ochÄnneren