Eech zu Koler

D'Eech zu Koler ass eng Summereech (Quercus robur; chêne pédonculé; Stieleiche) déi am Flouer Ierwebësch resp. Buchholz am Oste vu Koler an der Gemeng Garnech steet.

Eech zu Koler
E Stamm deen a véier gedeelt ass (Mäerz 2008)
Kategorie	Bemierkenswäert Beem zu Lëtzebuerg
Land	Lëtzebuerg
Gemeng	Garnech
Plaz	Koler
Adress	Ierwebësch / Buchholz
Koordinaten	49°37'45,30"N, 5°56'33,90"O
Bamaart	Stilleech
Geschaten Alter	315 a
Héicht	35 m (2000)
Duerchmiesser	1,62 m (2000)
Ëmfang	5,08 m (2000)

De wäisse Fäil riets ënnen am Bild weist de Pad dee bei d'Eech féiert.

Wéinst hirem aussergewéinleche Stamm, dee sech an enger Héicht vun 1,50 m a véier Niewestämm opdeelt, déi bis 35 m eropgewuess sinn, zielt d'Eech zënter 1981 zu de bemierkenswäerte Beem zu Lëtzebuerg.

Lokalisatioun

D'Eech ass e bësse ‘verstoppt, matzen an engem Bësch.

De Bam fënnt ee wann een zu Koler d'Strooss op Garnech (Rue de Garnich) erop fiert. Nom Ausgank vu Koler hëlt een, ongeféier op hallwer Héicht vum Hank, deen drëtte goudronéierte Feldwee op der lénkser Säit. Do wou de Makadamm ophält geet et zu Fouss weider, laanscht de Bëschrand, bis de Wee an de Bësch eraféiert. De Wee dréint do no riets a gëtt dann e schmuele Pad dee queesch duerch de Bësch féiert. No zirka 100 m am Bësch fält dann op der lénkser Säit, zirka 20 m vum Pad ewech, déi gesichten Eech duerch hire mächtegen, a véier gedeelte Stamm op. Ronn 50 m hanner der Eech féiert de Pad op eng Wiss, déi op béide Säite vum Bësch encadréiert ass.

Entwécklung vum Bam

D'Kroun vum Bam ass wéineg an d'Breet entwéckelt, wat drop zeréckzeféieren ass, datt s'an engem dichte Bestand gewuess ass. Hiren Alter kann op tëscht 290 an 340 Joer geschat ginn^{(Stand 2024)}.

Ongeféier Moosse vum Bam (m)

Joer	$U$	$d$	$h$
1980	4,80	1,53	33,00
≈2000	5,08	1,62	35,00

Domat ass d'Eech vu Koler déi 7-déckst Eech an den 20-déckste Bam zu Lëtzebuerg.

Quellen

• Sinner, J. et al., 2002. Les arbres remarquables. Administration des eaux et forêts. Musée national d'histoire naturelle. 255 S. (Cf. S. 38-39, Text a Foto).
• Administration des eaux et forêts, 1981. Arbres remarquables du Grand-Duché de Luxembourg. Imprimerie Saint-Paul, 167 S. (Cf. S. 18-19, Foto an Text).

Kuckt och

• Bemierkenswäert Beem zu Lëtzebuerg

Um Spaweck

Commons: Eech zu Koler – Biller, Videoen oder Audiodateien