Caecilia vu Roum

D'Helleg Caecilia oder Cecile/Cécile, och Caecilia vu Roum genannt, ass eng chrëschtlech Helleg a Märtyrerin. Der Legend no huet si am 2. oder 3. Joerhonnert zu Roum gelieft. D'Helleg Caecilia gëtt als Patréinesch vun de Museker veréiert.

Caecilia vu Roum
Déi helleg Caecilia op engem Bild vum Simon Vouet, ëm 1626
Titel
Biographie
Gebuer	180 jul. Roum
Gestuerwen	22. November 230 jul. Roum
Doudesursaach	Käppen
Nationalitéit	Réimescht Räich
Aktivitéit	Museker
Aner Informatiounen
Statut	Helleg
Gedenkdag	22. November

D'Helleg Caecilia, duergestallt vum franséische Moler Adolphe Lalyre (1848–1933)

Detail vun der Caecilia hirer Hand, op der Skulptur vum Stefano Maderno

Legend a Geschicht

Der Legend no huet d'Caecilia zu Roum vill Leit zum Chrëschtentum bekéiert, ugefaange bei hirem Mann an hirem Schwoer. Wéi et schéngt gouf si a kache Waasser gezappt, wat hir allerdéngs näischt ausgemaach huet. Doropshi gouf si gekäppt, wat awer och net evident war, well den Henker et net fäerdeg bruecht huet hir de Kapp propper ofzetrennen. Sou hätt si nach dräi Deeg agoniséiert a vun där Zäit profitéiert fir weiderhin äifreg ze bekéieren an hiert Verméigen un déi Arem ze verdeelen.

Am Joer 821 goufen hir Iwwerreschter an de Callixtus-Katakomben erëmfonnt an an der nei gebauter Kierch Santa Cecilia in Trastevere am réimesche Quartier Trastevere begruewe. 1599 gouf de Kierper gutt erhale bei enger Renovatioun vun der Basilika erëm entdeckt. An der Folleg ass déi berüümt Skulptur vum Stefano Maderno (1576-1636) entstanen, bei där d'Caecilia op enger Hand een an op der anerer dräi Fangeren ausgestreckt huet. Dëst weist op dat chrëschtlecht Glawensbekenntnis hin: et gëtt nëmmen ee Gott, dee sech an dräi Forme weist: d'helleg Dräifaltegkeet.

Duerstellung

D'Caecilia gëtt gemenkerhand mat Rousen, engem Schwäert an engem Museksinstrument (Uergel oder Gei) duergestallt.

Veréierung

Der Caecilia hiert Fest ass den 22. November.

Si gëtt als Patréinesch vun der Kierchemusek, den Organisten, Uergelbauer, Instrumentebauer, Sänger, Museker an Dichter veréiert. Si ass och d'Patréinesch vun der franséischer Stad Albi.

Kuckt och

• Lëscht vun de chrëschtlechen Hellegen

Um Spaweck

Commons: Caecilia vu Roum – Biller, Videoen oder Audiodateien

• D'Helleg Caecilia am heiligenlexikon.de