André Heiderscheid

Den André Heiderscheid, gebuer den 30. Dezember 1926 zu Luerenzweiler, a gestuerwen de 17. Mäerz 2018 zu Ettelbréck^,, war e lëtzebuergesche Geeschtlechen, Auteur a Publizist.

André Heiderscheid
Gebuer	30. Dezember 1926 Luerenzweiler
Gestuerwen	17. Mäerz 2018 Centre hospitalier du Nord
Nationalitéit	Lëtzebuerg
Aktivitéit	Kathoulesche Priister, Journalist

Den André Heiderscheid um Riednerpult wéi den Hans-Gert Pöttering de Mérite européen krut, am Hannergrond de Jean-Claude Juncker an den Helmut Kohl

Seng Formatioun

• Secondaire am Athenäum vu Lëtzebuerg.
• De Secondaire huet hien 1944 missen ënnerbriechen, well en an de Reichsarbeitsdienst, a Polen, an duerno als Zwangsrekrutéierten an déi däitsch Wehrmacht agezu gouf.
• Den 23. Januar 1945 koum hien a Schlesien un d'Front fir géint d'Rout Arméi ze kämpfen. Den 9. Mee 1945 gouf hien a Béimen vun tschechesche Partisane gefaange geholl an ass dunn a russesch Krichsgefaangeschaft komm. De 25. August 1945 gouf hien a Polen aus der Krichsgefaangeschaft entlooss a koum iwwer Berlin a Bréissel de 24. September 1945 nees heem.
• Duerno Virbereedung zum Geeschtlechen am Seminaire zu Lëtzebuerg.
• 1953 gouf den André Heiderscheid zum Geeschtleche geweit.
• Soziologiestudium zu Paräis.

Karriär a Wierken

• Den "Abbé" (wéi hien op ville Plazen am Land genannt gëtt) huet 1959 seng Karriär als Redakter am Luxemburger Wort ugefaangen. 1967 ass en zum Chefredakter avancéiert an 1971 huet en den Alphonse Turpel als Direkter vum Luxemburger Wort an als Administrateur-délégué vun der Imprimerie Saint-Paul ofgeléist. Déi Funktiounen hat hie bis zu senger Pensioun.
• Vun 1983 bis 1985 war hie President vum Conseil de presse, dem lëtzebuergesche Presserot.
• Zanter 1977 ass hie Member vum Doumkapitel a vun 1993 bis 2012 war hien Doumprobst, de Preposé vum Doumkapitel vun der Äerzdiözes Lëtzebuerg.
• Hien ass President vum Verwaltungsrot vun der Fondatioun vum Mérite Européen.
• Wärend ville Jore war e President vum Organisatiounscomité vum Tour de Luxembourg.

Seng Publikatiounen

• Heiderscheid, André: Aspects de Sociologie Religieuse du Diocèse de Luxembourg. 2 vol. Luxbg 1961-1962;
• Heiderscheid, André: Die USA zwischen gestern und morgen, Verl. Sankt-Paulus-Druckerei (1963).
• Heiderscheid, André; Kanter, Adolf: President François Visine 70 Jahre (1992).
• Heiderscheid, André: Zwangsrekrutiert. Das deutsche Verbrechen an der Luxemburger Jugend;

Band 1: Ein Buch wider das Vergessen, Éditions Saint-Paul, Luxembourg (2000), ISBN 2-87963-344-3.

Band 2: Noch ein Buch wider das Vergessen, Éditions Saint-Paul, Luxembourg (2001), ISBN 2-87963-359-1.

Band 3: Mein drittes Buch wider das Vergessen, Éditions Saint-Paul, Luxembourg (2001), ISBN 2-87963-371-0.

• Heiderscheid, André, Nicky Grashoff (1926 - 1945): "Mort pour la patrie" "Wir leben und sterben für Luxemburg!" - In: 400 Joer Kolléisch. - Luxembourg: Ed. Saint-Paul; 2003. - Vol. IV: Hommage à l'Athénée, p. 125-132, ill.
• Heiderscheid, André: Die Befreiung Luxemburgs im September 1944. - In: Luxemburger Marienkalender. - Luxemburg. Jg. 123(2004), p. 180-193, ill.
• Heiderscheid, André: Nie wieder (Album mat Text a Biller iwwer d'Kazetter) 206 S., Luxembourg, Band 1, Éditions Saint-Paul 2006.

Um Spaweck

• Offiziell Säit vun der Imprimerie Saint-Paul