Wäiss Pateren

D'Wäiss Pateren, eigentlech Societas Missionariorum Africae SMA, op Franséisch Société des missionaires d'Afrique, ass e kathoulesche Männeruerden a gehéiert zu de wichtegste kathoulesche Missiounsuerden vun der Neizäit. D'Ofkierzung fir déi Geeschtlech ass M. Afr..

Wäiss Pateren am Mariendall (1965)

Den Uerde vun de Wäisse Patere, eng Vereenegung vu Bridder a Geeschtlechen, gouf 1868 vum deemolegen Äerzbëschof vun Alger, dem spéidere Kardinol Charles Martial Allemand Lavigerie, fir d'Afrikamissioun gegrënnt.

Zu Lëtzebuerg haten d'Wäiss Pateren hire Sëtz am Mariendall bis 1975. Do war och hiren „Afrika Musée“, dee vu ville Schoulklasse besicht gouf an deen déi Jonk faszinéiere sollt.

Si hunn eng eegen Zäitschrëft erausginn, déi puermol den Numm geännert huet: Afrikabote (1895-1940), D'Weiss Pateren an Afrika (1946-1958), Afrika (1959-1966). No 1967 hu se zesumme mat anere Missiounsorganisatiounen am Ausland déi däitschsproocheg Zäitschrëft Kontinente erausginn.