Verbindung E40-E25

D'Verbindung E40-E25 ass eng Autobunn um Territoire vun der Stad Léck. Wann et vum Konzept hier, a wéinst dem Bau mat nëmmen zwou Piste vun 3,5 Meter, éischter eng Stadautobunn ass, sou ass et dach e wichtegt Glidd am Netz vun de wallouneschen an europäeschen Autobunnen, well duerch hire Bau dat lescht Autobunnsstéck dat op der Streck Amsterdam - Mailand gefeelt huet, realiséiert gouf.

Well se no laanscht den Zentrum vu Léck féiert, an en Uschloss un déi nei TGV's Gare sollt hunn, hunn e ganze Pak Contraintë misse mat a Kaf geholl ginn, an et hu schwiereg technesch Problemer misse geléist ginn. Fir dat knapps 4 km laangt Stéck, dat d'E25 / A26 zu Chênée mat der Penetrante A 602, an doriwwer eraus mat der E40 / A3 um Verdeeler Loncin verbënnt, hunn e ganze Koup Konschtbauten an nei Amenagementer oder Vergréisserunge misse realiséiert ginn, dovun:

• 3 Verdeeler: Verdeeler Guillemins, Verdeeler Tilleuls a Verdeeler Grosses Battes.
• 4 Tunnellen: Tunnel vu Cointe, Tunnel vu Kinkempois, Tunnel op de Grosses Battes an en Tunnel op den 18 Arcades
• 2 Brécken um Tracé: Pont de Liège am Val-Benoît iwwer d'Meuse an d' Bréck Sauheid iwwer d'Ourthe
• Iwwer der Autobunn: 1 Bréck als Accès fir de Parking vun der Gare, de Pont de l'Observatoire och nach Calatravabréck genannt an d'Foussgängerbréck am Quartier Tilleuls.
• Nieft der Autobunn: D'Passerelle des Aguesses, fir eng Bréck iwwer dem Ourthe-Kanal déi ewechgerappt gouf, z'ersetzen.
• Fir de Bau vun der 480 m laanger Tranchée ouverte zu Angleur gouf den Ourthe-Kanal deen do gelaf ass, dréchegeluecht an eng ronn 50 m no riets deplacéiert.

Literatur

• Deru, Jean-Luc; E40-E25, souvenirs d'une liaison. Eng fotografesch Dokumentation vun den Aarbechten.