Sonneblumm

D'Sonneblumm (Helianthus annuus) ass eng Planzenaart aus der Gattung vun de Sonneblummen (Helianthus) bannent der Famill vun den Asteraceae.

Sonneblumm

Sonneblumm (Helianthus annuus)
Wëssenschaftlech Klassifikatioun
Räich	Planzeräich
Ënnerräich	Tracheobionta
Ofdeelung	Bléieplanzen
Klass	Magnoliopsida
Ënnerklass	Asteridae
Uerdnung	Asterales
Famill	Asteraceae
Ënnerfamill	Asteroideae
Gattung	Sonneblummen (Helianthus)
Wëssenschaftlechen Numm
Helianthus annuus
L.

D'Sonneblumm ass eng krauteg Planz, déi 1 bis 2 Meter, och alt emol 2,2 Meter héich ka ginn. Si blitt vu Juli bis September. D'Bléiekierf hunn en Duerchmiesser vun 10 bis 40 Zentimeter. D'Bléieblieder si gewéinlech giel a 6–10 cm laang, d'Rouerbléie bannendra si brong. Hir Wuerzele gi bis zu 2 Meter déif. Et ass eng eejäreg Planz .

Hiren Numm huet se net nëmme vun hirem Ausgesinn hier, ma och wéinst hirer Fäegkeet, sech der Sonn no ze dréinen (Heliotropismus).

D'Sonneblumm ass eng Kulturplanz, déi ursprénglech aus Nord- a Mëttelamerika hierkënnt, wou se schonn nogewise viru ronn 2500 v. Chr. ugebaut gouf. D'Spuenier hu se vum 16. Joerhonnert un an Europa bruecht, wou se ufanks als Dekoratiounsplanz ugebaut gouf. Zënter dem 17. Joerhonnert goufen d'Käre geholl fir ze Baken, oder als Ersatz fir Kaffi. Eréischt vum 19. Joerhonnert u gëtt d'Sonneblumm gezillt, fir Ueleg aus hire Kären ze gewannen. Hir Käre ginn de Wanter och heefeg benotzt fir d'Vigel ze fidderen.

Hautdesdaags sinn déi gréissten Ubauregioune China, d'Vereenegt Staaten, Russland, d'Ukrain an aner europäesch Länner.

Nährwäert

Vitaminnne jee 100 g Sonneblummekäeren:

Inhaltsstoff	Wäert	Unitéit
Vitaminn D	0	µg
Vitaminn E Aktiv.	38,84	mg
Folsaier	121	µg
Vitaminn B1	1,9	mg
Vitaminn B2	0,26	mg
Vitaminn B6	1,27	mg
Vitaminn C	0	mg
α-Tocopherol	37,2	mg
Vitaminn K	0	µg
Biotin	56	µg
Retinolequivalent	3	µg
β-Carotin	15	µg
fräi Folsaier	50	µg

Kategorien

Sonnenblummenzorte kënnen, jee nodeem firwat ee se zillt, a 4 Kategorien agedeelt ginn:

• fir Ueleggewënnung; dës hu besonnesch ville Rouerbléien, a Käre mat dënne Schuelen;
• fir ze verfidderen: déi hu besonnesch vill Blieder, a gi frësch oder a Form vu Silage u Béischte verfiddert, ma och als Dünger geholl;
• fir schéin ze maachen; dës wuessen a Gäert an hunn dacks méi wéi ee Bléiestand pro Planz;
• fir z'iessen; hei sinn d'Käre méi grouss a sëtze méi labber.

An der Konscht

Nature morte mat 15 Sonneblummen vum Vincent van Gogh.

Sonneblumme ginn dacks an der Molerei als Stilelement, absënns bei Nature-mortë vu Blummenarrangementer, gebraucht. Dem Vincent Van Gogh seng Tableaue mat Sonneblumme si wäit bekannt.

Literatur

• S. Krist, G. Buchbauer und C. Klausberger: Lexikon der pflanzlichen Fette und Öle. Springer Verlag, Wien 2008, S. 434–441, ISBN 978-3-211-75606-5.
• Walter Schuster: Die Züchtung der Sonnenblume. 1993, ISBN 3-489-53310-0.
• Haeupler et.al.: Bildatlas der Farn- und Blütenpflanzen Deutschlands. 2.Auflage, Ulmer-Verlag, ISBN 978-3-8001-4990-2
• R. Düll/ H. Kutzelnigg: Taschenlexikon der Pflanzen Deutschlands und angrenzender Länder, 7. Auflage, Quelle & Meyer-Verlag, 2011, ISBN 978-3-494-01424-1

Um Spaweck

Commons: Helianthus annuus – Biller, Videoen oder Audiodateien

• "Die Ahnen der Sonnenblume sind Amerikaner." op pflanzenforschung.de