Simmer Farm

D'Simmer Farm war eng Ziichterei fir Heel- a Gewierzkraider beim Lieu-dit Simmerfarm am Äischdall.

Déi fréier Simmerfarm (Summer 2018).

Geschicht

Wéi 1932 d'Schmelz zu Stengefort hir Dieren zougemaach huet, war dat absënns fir d'Aarbechter eng batter Decisioun, well si all hir Aarbecht verluer hunn. Fofzeg vun hinnen hunn awer op der Simmer Farm eng nei Beschäftegung an enger staatlecher Statioun fir den Ubau an de Gebrauch un Heel- a Gewierzkraider fonnt.

1934 hat de Staat en Terrain vum Jean-Vital Campill ofkaaft an op Initiativ vum Pierre Dupong dës Statioun gegrënnt, fir géint d'Aarbechtslosegkeet virzegoen, déi an der Regioun ëmmer méi zougeholl huet. Gläichzäiteg goufe sech Aspuerungen erhofft, well d'Kraider mat deierem Geld aus dem Ausland hu missen importéiert ginn.

D'Aarbechter kruten op der Statioun eng Plaz fir annerhalleft Joer. Si hu souzesoe vun der éischter staatlecher Beschäftegungsmoossnam profitéiert. Op der Simmerfarm goufen ongeféier 108 verschidden Heel- a Gewierzkraider gezillt. Aus de Kraider goufe Likören, Elixiren, Zoppen, Britten an aner Liewensmëttel hiergestallt.

1947 koume Gespréicher op, datt de Betrib vun der Simmer Farm net méi rentabel wier an d'Aarbechter nëmmen eng Woch iwwer déi aner schaffe géifen. Dat huet sech duerno och confirméiert an 1949 huet de Staat d'Simmer Farm fir de Verkaf oder d'Locatioun ausgeschriwwen. Duerch d'Gesetz vum 22. Mäerz 1950 krut d'Regierung erlaabt, d'Immobilië vun der Simmer Farm iwwer eng ëffentlech Stee ze verkafen. Den 23. Mee 1950 huet de Paul Reichel, de fréieren Exploitant vun der Farm, d'Immobilië fir 1,75 Millioune Frang gesteet.

Nodeems d'Simmer Farm als Kraiderproduzent zougemaach gouf, war se fir e puer Joer laang (1963-1967) un d'Firma Hatema verlount ginn, déi fir DuPont de Nemours cheemesch Faseren ënnert dem Numm Dacron Fiber Fill fabrizéiert huet.

Haut sinn an de Gebailechkeete Wunnengen déi verlount ginn.

Produiten vun der Simmer Farm

Reklamm fir d'Valiska-Zoppen am Luxemburger Wort vum 4. Abrëll 1946

Krikox-Reklamm (1965)

• Zoppekraider fir d'Krikox-Britt;
• Valiska Geméiszoppen;
• Apéro Anise des sept châteaux;
• Elixir jaune des 7 châteaux;
• Simmerfarm's Kräuter-Magenbitter;
• Crème de menthe;
• Crème d'orange;
• Crème de cacao;
• Amer Valiska;
• Apéro Anisé;
• Cherry Brandy;
• Schnorry;
• Eaux dentifrices;
• Alcool de Menthe;
• natierleche Framboisejus;
• Téi an Téimëschungen;
• Zoppegeméis a gedréchent Geméis;
• Gewierzer vun all Zort fir d'Hausfraen, Hotel-Restaurant a Metzler.

Biller

• 
  Wunnengen an der fréierer Simmerfarm (Summer 2018).

Um Spaweck

Commons: Simmer Farm – Biller, Videoen oder Audiodateien

• Patrick Besch, Die Simmerfarm - Eine der ersten Beschäftigungsmaßnahmen in den 1930er-Jahren am Wort vum 11./12. August 2018, Säit 2