Pausanias (Geograph)

Dësen Artikel beschäftegt sech mam griichesche Geograph Pausanias. Fir aner Bedeitungen, kuckt wgl. Pausanias.

De Pausanias war en anticke griichesche Geograph a Reesenden am 2. Joerhonnert eiser Zäit.

De Pausanias ass am Ufank vum 2. Joerhonnert (~110/115) a Klengasien op d'Welt komm. Iwwer säi Liewen ass net vill gewosst, well d'antik Auteure schwätze quasi net vun him, an hie selwer verréit och net vill iwwer sech.

Hien huet warscheinlech säi Studium an enger vun de grousse Stied op der Egäisküst gemaach, déi ënner der Pax romana erëm opgebléit sinn, an e Foyer vu griichescher Kultur waren. Seng Formatioun war op allefall zolidd, hien huet all déi grouss klassesch Auteure kannt, geneesou wéi déi méi modern vu senger Zäit.

Wat hien am meeschten intresséiert huet, waren déi antik reliéis Aspekter: Statuen, Gebaier, Riten, Mythologie... .

De Pausanias ass vill an der griichescher Welt ronderëmgereest, an huet seng Erfarungen a sengem Wierk néiergeschriwwen.

Periégesis tes Hellados

Dem Pausanias säin eenzegt Wierk ass d'Periégesis tes Hellados (lëtz.: Beschreiwung vu Griicheland). Geschriwwen tëscht 150 an 175 ass dëst Wierk an 10 Bicher opgedeelt, déi d'Regioune vu Griicheland beschreiwen. Säi Wierk ass eng wichteg Source fir d'Archeologie. Mam Text vum Pausanias am Grapp goufen déi éischt Ausgruewungen zu Olympia an Delphi gemaach, an duerch seng Beschreiwunge konnte vill Ruinen identifizéiert ginn.

• Buch I: Attika
• Buch II: Korinth an Argolis
• Buch III: Lakonien
• Buch IV: Messenien
• Buch V a VI: Elis
• Buch VII: Achaea
• Buch VIII: Arkadien
• Buch IX: Böotien
• Buch X: Phocis a Lokris

Literatur zum Theema

• Christa Frateantonio: Religion und Städtekonkurrenz. Zum politischen und kulturellen Kontext von Pausanias' "Periegese". De Gruyter, Berlin [u. a.] 2009, ISBN 978-3-11-020689-0.
• William Hutton: Describing Greece. Landscape and literature in the 'Periegesis' of Pausanias. Cambridge University Press, Cambridge 2005, ISBN 0-521-84720-6.
• Maria Pretzler: Pausanias. Travel Writing in Ancient Greece. Duckworth, London 2007, ISBN 978-0-7156-3496-7.
• William Kendrick Pritchett, Pausanias Periegetes, Gieben, Amsterdam, 1998.
• Karim W. Arafat: Pausanias’ Greece. Ancient Artists and Roman Rulers. Cambridge University Press, Cambridge 1996, ISBN 0-521-55340-7.
• Christian Habicht: Pausanias und seine „Beschreibung Griechenlands“. C. H. Beck, München 1985, ISBN 3-406-30829-5.
• Ove Strid: Über Sprache und Stil des Periegeten Pausanias. Almqvist & Wiksell, Stockholm 1976, ISBN 91-554-0369-7.
• Georges Roux, Pausanias en Corinthie, Belles Lettres, Paräis, 1950.
• Georges Daux, Pausanias à Delphes, Boccard, Paräis, 1936.
• Sir James George Frazer, Sur les traces de Pausanias: A travers la Grèce ancienne, Belles Lettres, Paräis, 1927.

Um Spaweck

• (en) Periégesis tes Hellados - englesch Iwwersetzung.
• (fr) Periégesis tes Hellados - franséisch Iwwersetzung.

Hellenopedia – All d'Artikelen op der Wikipedia iwwer Griicheland an der Antiquitéit.