Marque nationale fir Schwéngefleesch

D' Marque nationale fir Schwéngefleesch a Produkter, déi vun deem Fleesch gemaach ginn, ass eng lëtzebuergesch Marque nationale, déi duerch de Règlement grand-ducal vum 3. November 2010 agefouert gouf.

Si deckt engersäits d'Fleesch vu Schwäin of, déi bestëmmte Genotyppen a Phenotyppen entspriechen, an déi no festgeluechte Krittäre geziicht, gefiddert, transportéiert, geschluecht, zerluecht a verkaaft goufen. All dës sinn an engem Cahier de charges festgeluecht.

Sou muss z. B. d'Opzillen, d'Schluechten, d'Zerleeën an d'Verschaffe vum Fleesch zu Lëtzebuerg gemaach gi sinn.

Op der anerer Säit bezitt se sech op d'Fleesch- a Charcuteriesprodukter, déi dovu gemaach ginn. Dës sinn ë. a.:

• réi gereezt Ham;
• Schwéngszoossiss;
• gekacht a gereezt Ham;
• Schwéngspâté;
• Mettwurscht;
• More Speck;
• gedréchente Judd.

Och dofir gëtt et e Cahier de charges, dee fir all Produkt definéiert, wat fir Stécker Fleesch verschafft ginn, wat fir Salzer, Gewierzer a soss Zousätz derbäikomme kënnen, wéi se konditionéiert musse ginn, asw.