Kathedral vu Vilnius

Kathedral vu Vilnius
Land	Litauen
Gemeng	Vilnius
Koordinaten	54°41'9,20"N, 25°17'16,36"O
Baustil	neoklassizistesch Architektur
Datum vum Bau	1387 (julianesch)
Opgaangen	1783

D'Kathedral vu Vilnius, (op Litauesch Vilniaus Šv. Stanislovo ir Šv. Vladislovo arkikatedra bazilika „Vilniusser Kathedral St. Stanislaus a St. Ladislaus“) ass d'réimesch-kathoulesch Kathedral vum Bistum Vilnius.

Hiert haitegt Ausgesinn geet op en Entworf am klassizistische Stil vum Laurynas Gucevičius zeréck a gouf 1801 fäerdeggebaut. Wéi bei ville Kierchen am Baltikum steet de Klackentuerm separat.

D'Patréiner sinn den hellege Bëschof Stanislaus vu Krakau an den hellege Ladislaus I., Kinnek vun Ungarn.

Si steet op der Kathedraleplaz an der Alstad vu Vinius.

Geschicht

Dat haitegt Gebai steet op der Plaz vun enger klenger dräischëffeger hëlzener Kierch, déi zu der Zäit vum Kinnek Mindaugas am 13. Joerhonnert opgeriicht gouf, do, wou bis dohin eng heednesch Kultplaz war. De Mindaugas war aus politesche Grënn zum Chrëschtentum iwwergetrueden. Dono huet et awer nach e gutt Joerhonnert gedauert, bis et mam Chrëschtentum eescht gouf: Fir déi polnesch Kroun ze kréien, huet de Groussfürst Jogaila sech deefe gelooss an 1387 eng nei Kierch opriichte gedoen. Dës gouf Bëschofssëtz an och de Sëtz vun der éischter reliéiser Schoul.

1419 ass dëst Gebai ofgebrannt a gouf ënner dem Groussfürst Vytautas duerch en neit am gotesche Stil ersat. Am Laf vum 15. a 16. Joerhonnert goufen op béide Säite Kapellen ugebaut. All Kéiers no engem Brand gouf, am Baustil vun dunn, Renaissance (1534-1557) a Barock (1612-1632), d'Gebai ëmgebaut. 1624-1636 gouf d'Kasimir-Kapell opgeriicht. Nom Krich mat Moskau, 1654-1657, dee vill Schued gemaach huet, gouf d'Kathedral 1666-1676, besonnesch bannenan, frësch gemaach. 1769 ass de Blëtz an ee vun den Tierm geschloen, dee beim barocken Ëmbau vum Portal gebaut gi war, an en ass an e Koup gefall.

Vu 1783 bis 1801 gouf d'Gebai, dës Kéier am klassizistesche Stil, wéi en haut nach ze gesinn ass, no Pläng vum litaueschen Architekt Stuoka-Gucevičius, ëm- an nees opgebaut.

Nom Zweete Weltkrich, wärend der Sowjetherrschaft, war d'Gebai eng Konschtgalerie.

Zanter 1989 ass et nees eng Kierch.

Biller

Dat gotescht Gebai, 1530
D'Kathedral mam Klackentuerm
Viischt Fassad
Bannenan
Altoer

Um Spaweck

Commons: Kathedral vu Vilnius – Biller, Videoen oder Audiodateien