Blinddaarm
De Blinddaarm oder Blinddarm (lat.: caecum, coecum oder cecum, respektiv intestinum caecum) ass en Deel vum Daarm vum Mënsch a villen Déieren. Et ass den éischten Deel vum Déckdaarm, deen um Enn vum Dënndaarm ewéi e Sak erof an d'Bauchhiel geet. Domat ass de Blinddaarm en Deel vum Mo-Daarm-Trakt.
Beim Mënsch läit en am rietsen, mëttleren Deel vum Bauch an huet eng Gréisst vun duerchschnëttlech sechs bis aacht Zentimeter. Bei ville Planzefrësser ass e méi grouss.[1] Déi meescht Vullen hunn zwéi Blinddäerm.[2]
Um Enn vum Blinddaarm hänkt de klenge Wuermwutz. Wann deen entzünt ass, schwätzt ee vun enger Appendicitt, déi ëmgangssproochlech fälschlecherweis och "Blinddaarmentzündung" genannt gëtt. De Blinddaarm u sech entzünt sech dobäi net.[3],[4]
Aus dem leschten Deel vum Dënndaarm, dem Ileum, kënnt den Iessensbräi an de Blinddaarm. Dofir muss en duerch eng Klapp, déi nëmmen an eng Richtung opgeet. Dat verhënnert, datt de Bräi an déi falsch Richtung zeréckfléisst. Am Blinddaarm an am Wuermwutz gëtt Daarmflora gespäichert, déi de Kierper zum Beispill no enger Duerchfallerkrankung an de Rescht vum Daarm ka weider ofginn. De Blinddaarm besteet gréisstendeels aus lymphateschem Tissu, deen Ofwierzelle bilt, soubal wéi onerwënscht Bakteerien an de Kierper kommen. Domat zielt de Blinddaarm zum Immunsystem.[5]
Besonnesch bei de Planzefrësser zersetzen d'Bakteerien am Blinddaarm d'Zellulos am Iessensbräi.[6]
Um Spaweck
änneren| Commons: Blinddäerm – Biller, Videoen oder Audiodateien |
Referenzen
änneren- ↑ DocCheck Flexicon: Blinddarm
- ↑ spektrum.de: Blinddarm
- ↑ Öffentliches Gesundheitsportal Österreichs: Blinddarmentzündung
- ↑ gesundheitsinformation.de: Blinddarmentzündung (Appendizitis)
- ↑ Blinddarm – klein und funktionslos? (1. Oktober 2019)
- ↑ deutschlandfunk.de: Radiolexikon: Blinddarm vum Justin Westhoff (22. Juli 2008)