Beiemusée vun Tilff
De Beiemusée vun Tilff am Dall vun der Ourthe besteet zanter 1974. En ass an der fréierer Scheier vum Schlass Brunsode ënnerbruecht.
Et ass e massiivt Gebai dat deelweis aus bloe Steng an eisenhaltegem Granit gebaut ass. Um Giewel am Weste ass iwwer der Scheierpaart e Giewelrelief ze gesinn, dee vum Schlass de Villers vu Bilstain hierkënnt, a vun engem vun de leschte Besëtzer dem Edmond Lieutenant dee vun do gestaamt huet ubruecht gouf. Am Relief ass de Wope vun der Famill De Goër vun Herve a Borlez ze gesinn. En ass 1740 datéiert.
De Musée ass a véier Sektiounen opgedeelt:
- An der Sektioun Exposition gëtt aalt a modernt Geschier gewisen, dat an der Beienzuucht gebraucht gëtt. Beiestäck an Instrumenter aus allen Häre Länner ginn dem Musée en internationale Cachet.
- An der audio-visueller Sektioun kann ee Montagen iwwer d'Aktivitéite vun de Beien an de verschiddene Periode vun hirem Liewe gesinn.
- An der sogenannter lieweger Sektioun kann een an zwéi verglaste Beiestäck d'Aarbecht vun de Beien observéieren.
- An der wëssenschaftlecher Sektioun gëtt et eng Kollektioun vun Insekter an Näschter déi d'Situatioun vun der Bei vis-à-vis vun aneren Hautfligler duerstellen.
De Musée ass am Abrëll, Mee, Juni a September, samschdes, sonndes, an d'Feierdeeg vun zwou bis sechs op.
Am Juli an August ass all Dag vun vun zéng bis zwielef, a vun vun zwou bis sechs op.
Iwwer d'ganzt Joer kann eng didaktesch Féierung fir Schoulklassen op Rendez-ausgemaach ginn. An der Gemengebibliothéik déi niewendrun am Schlass ass, kann ee Bicher iwwer d'Beie fannen, déi en do op der Plaz ka liesen, oder och léinen.