Moskwa-City

Moskwa-City (oder Moskau City, russ.: Москва-Сити) ass en neie Quartier an der russescher Haaptstad Moskau, deen nach am Gaang ass, gebaut ze ginn. Mam ganzen Numm heescht e Moskauer Internationalen Handelszentrum Moskwa-City (Московский международный деловой центр «Москва-Сити»).

E läit haaptsächlech um lénksen Uwänner vun der Moskwa, um westleche Bord vum Bezierk Zentrum, eng 5 km Loftlinn ewech vum Kreml. Et solle virun allem Geschäfts- a Bürosgebaier dohikommen, dorënner eng ganz Rëtsch héich an architektonesch spektakulär Wollekekrazerten. An eenzelen dovu si Luxuswunnengen dran.

1992 gouf d'Aktiëgesellschaft Moskwa-City gegrënnt, déi de ronn 100 Hektar groussen Terrain vun der Stad gepacht huet, fir dorop Bauprojeten auszeféieren. Den Terrain louch relativ no um Zentrum, a war gutt un d'Transportinfrastruktur ugeschloss. E puer Joer drop gouf mat den Aarbechten ugefaangen.

Markant Héichhaiser a soss Bauwierker (Auswiel)

Tower 2000 (2000/2001 als éischte fäerdeg), en Héichhaus mat 34 Stäck, an do derbäi d'Bagrationbréck (1997) iwwer d'Moskwa.
Evolution (virdrun City Palace oder Wedding Palace), 249 Meter héich mat 48 Stäck, war 2014 fäerdeg.
Imperia Tower, 239 Meter héich mat 60 Stäck (geplangt)
Gorod Stoliz (engl. Capital City; 2010 fäerdeg), 2 Tierm, deen een ("Moskau") 302 héich mat 76 Stäck, deen aneren ("Sankt Péitersbuerg") 257 Meter héich mat 65 Stäck. D'Tierm gesinn aus wéi openeegetässelt Baukastestécker.
Naberejnaja-Tuerm, e Komplex mat 3 Héichhaiser, dorënner een 268 Meter héije Wollekekrazert (fäerdeg resp. 2003, 2004 an 2007).
Eurasia (am Bau), soll 309 Meter héich ginn a 75 Stäck hunn.
Federazija, e Projet vun 2 Héichhaiser mat driwwer enger Tuermspëtzt vu 506 Meter, eent vun 360 Meter/93 Stäck an eent vun 243 Meter/62 Stäck (ugefaangen 2004, soll 2017 fäerdeg ginn).
Mercury City Tower, 339 Meter héich mat 75 Stäck (vun 2009 bis 2013 am Bau).
Oko Business Centre, e Gebaikomplex aus dräi Tierm: um Südtuerm hu se vun 2011 bis 2015 geschafft fir en op 354 Meter a 85 Stäck eropzezéie wouduerch e momentan deen héchste Wollekekrazert an Europa ass, den Nordtuerm huet 245 Meter an 49 Stäck, an dann ass dernieft nach en dräi Stären Hotel mat 79 Meter an 22 Stäck.
Nordtuerm (russ. Северная башня), 108 Meter mat 27 Stäck, 2007 fäerdeg.

Um Spaweck

Commons: Moskau City – Biller, Videoen oder Audiodateien