Mikroskop

E Mikroskop ass e wëssenschaftlecht Instrument fir Objeten ze kucken, déi ze kleng sinn, fir se mat bloussem A kënnen ze gesinn.

D'Wëssenschaft vum Observéieren a Studéiere vu klengen Objeten a Strukture mat engem Mikroskop gëtt "Mikroskopie" genannt. Mikroskope gi gebraucht an der Biologie, der Medezin an an der Wëssenschaft vun de Materialien, soubal eng Lupp net méi genuch vergréissert.

D'physesch Prinziper déi gebraucht gi fir ze Vergréissere kënne ganz ënnerschiddlech sinn. Déi Bekanntst sinn d'optesch Mikroskopen déi mat enger oder méi Lënsen ekipéiert sinn, duerch déi d'Liicht vun engem beliichten (oder duerchliichten) Objet recuperéiert gëtt. Duerch den technesche Fortschrëtt konnten aner Techniken entwéckelt ginn, fir méi prezis Biller ze kréien, wéi d'elektronesch Mikroskopen oder d'Mikroskope an noem Feld.

Etymologie

D'Wuert "Mikroskop" kënnt vum Algriichesche μικρός ("kleng") a σκοπεῖν ("kucken").