Maurice Clement

De Maurice Clement, gebuer 1972 zu Lëtzebuerg, ass Titularorganist vun der Philharmonie, Titularorganist vun Dikrech a Professer am Conservatoire vum Norden.

Maurice Clement
Gebuer	1972 Lëtzebuerg
Nationalitéit	Lëtzebuerg
Aktivitéit	Organist
Famill
Papp	Raymond Clement

Hien ass de Jong vum Fotograf Raymond Clement.

Studien an Auszeechnungen

De Maurice Clement huet seng Ausbildung am Conservatoire vun der Stad Lëtzebuerg ugefaangen a mat Premiers prix an der Uergel, dem Piano, der Kammermusek an der Musektheorie ofgeschloss. Duerno huet hie weider Uergel, Museksgeschicht a Musektheorie studéiert, vun 1992 bis 1996 beim Jean Ferrard zu Bréissel, a schliisslech beim Jean Boyer zu Lyon.

Donieft huet hie Meeschtercourse besicht bei dem Lorenzo Ghielmi, dem Michael Radulescu an dem Louis Robilliard.

Hien ass och Laureat vum Internationale Gottfried-Silbermann-Concours vun 1997 op historeschen Uergele vu Freiberg (Sachsen).

Aktivitéiten

Nieft senger Aarbecht als Titularorganist vun der Schuke-Uergel an der Philharmonie a vun den Dikrecher Kierchenuergelen hält de Maurice Clement Course fir Uergel an Improvisatioun am Conservatoire vum Norden.

Hien huet Wierker vum Johann Sebastian Bach a vum Carl Philipp Emanuel Bach op CD an DVD-Audio agespillt. Seng CD-Opname mat improviséierter Musek sinn an der Fachpress gelueft ginn.

Am Kader vun internationale Festspiller huet hie Concerte ginn zu Paräis, Lyon, Bréissel, Gent, Léck, Lëtzebuerg, München, Freiberg, Leipzig, Halle, Oederan, Zürich, Prag, Wien, Milstatt, Innsbruck, Kopenhagen a Mailand.

Kuckt och

• Lëscht vu lëtzebuergesche Museker

Um Spaweck

Commons: Maurice Clement – Biller, Videoen oder Audiodateien

• Internetsite vum Maurice Clement (de)(fr)(en)