Marxismus
De Marxismus ass eng Gesellschaftsléier, déi hiren Ursprong am 19. Joerhonnert huet an op den Theorië vum Karl Marx a vum Friedrich Engels baséiert. Et ass eng Analys a Kritik vum Kapitalismus zu där Zäit.[1] D'Endzil vum Marxismus ass eng kommunistesch Gesellschaft ouni sozial Klassen.[2]
Iwwerbléck änneren
Am Marxismus gëtt d'Geschicht vum Mënsch als Geschicht vu Klassekämpf betruecht.[2] E kritiséiert haaptsächlech, datt d'Gesellschaft am Kapitalismus duerch d'Fortschrëtter an der Wirtschaftsproduktioun bestëmmt gëtt, an net duerch politesch oder moralesch Krittären. Duerch déi kapitalistesch Produktiounsweis géif d'Aarbechtsopdeelung an der Gesellschaft verdéift ginn: de wirtschaftleche Räichtum géif vun der Aarbechterklass, dem sougenannte Proletariat, geschaaft ginn, mä de Räichtum géif nëmmen un eng kleng Elite goen, déi och d'Produktiounsmëttel géife besëtzen. Fir de Karl Marx war dat eng Kontradiktioun an der kapitalistescher Produktioun: d'Aarbechterklass representéiert de gréissten Deel vun der Gesellschaft a produzéiert de Räichtum, mä d'Kapitalisten, e klengen Deel vun der Gesellschaft, eegene sech de Gewënn privat un.[1]
Der marxistescher Léier no kann de Widdersproch nëmmen duerch e revolutionären Opstand vun der Aarbechterklass eliminéiert ginn, deen noutwendegerweis och mat Gewalt a Kampf verbonnen ass.[2] Duerch déi Revolutioun géif d'Aarbechterklass d'Kapitalisten enteegnen an d'Eegentum an d'Produktiounsmëttel géifen an den ëffentleche Besëtz iwwergoen.[1]
De Kapitalismus géif duerno vum Sozialismus ofgeléist ginn, mä leschtendlech wier d'Endzil d'Etabléiere vun enger Gesellschaft ouni Klassen am Kommunismus.[3]
Literatur änneren
- Jon Elster, An Introduction to Karl Marx. Cambridge, England, 1986.
- Michael Evans, Karl Marx. London, 1975.
- Stefan Gandler, Critical Marxism in Mexico: Adolfo Sánchez Vázquez and Bolívar Echeverría, Leiden/Boston, Brill Academic Press, 2015. 467 pages. ISBN 978-90-04-22428-5.
- Robinson, Cedric J.: Black Marxism: The Making of the Black Radical Tradition, 1983, Reissue: Univ North Carolina Press, 2000
- Rummel, R.J. (1977) Conflict In Perspective Chap. 5 Marxism, Class Conflict, and the Conflict Helix
- Shenfield, S.D. Vladislav Bugera: Portrait of a Post-Marxist Thinker