Kierch Rolleng (Péiteng)

D'Kierch vu Rolleng ass eng kathoulesch Kierch, déi zur Par Kordall Sainte-Barbe am Dekanat Süden-West an zu der Gemeng Péiteng gehéiert.

Kierch vu Rolleng

Uertschaft / Plaz

Rolleng

Par

Par Kordall
Sainte-Barbe

Dekanat

Dekanat Süden-West

Numm / Patréiner

Hl. Maria Magdalena

Konsekratioun

1935

Architekt(en)

Jean Deitz

Koordinaten

49° 32’ 41.8’’ N
05° 51’ 17.4’’ O

Kierchen - Kapellen

Se ass der helleger Maria Magdalena geweit. Iwwer dem Agank vun der Kierch ass eng Skulptur vun der Maria Magdalena vum Claus Cito. Um Sockel vun der Skulptur steet de Baudatum 1935.

Se steet op der Kräizung vun der Rue de l'Église, der Rue de la Fontaine, der Grand-Rue an der Avenue de la Gare.

Geschicht

D'Kierch gouf vun 1933-1935 no de Pläng vum Architekt Jean Deitz am Stil vun den 1930er Jore gebaut, mat z. B. engem flaache Plaffong. Se huet eng Kierch aus dem 19. Joerhonnert vum Architekt Antoine Hartmann ersat (den Tuerm ass nach deen alen). Tëscht 1997 an 2000 hu grouss Renovéierungsaarbechte stattfonnt, no de Pläng vum Louis Weisgerber. Den 18. November 2000 huet den Äerzbëschof Fernand Franck d'Kierch mam neien Altor geweit. D'Kräizegungsgrupp vum Albert Hames aus dem Joer 1979 huet eng Plaz hannen am Chouer, iwwer dem Tabernakel fonnt.

Uergel

De 15. Januar 2006 huet den Äerzbëschof Fernand Franck eng nei Thunus-Uergel an der Rollenger Kierch ageseent.

Klacken

D'Klacke vu Rolleng waren ursprénglech fir d'Kierch vun Hoen bestëmmt. Déi goufen 1862 vum Nicolas Jaclard vu Metz gegoss. Nodeems d'Klacken awer scho fäerdeg waren, gouf zu Hoe festgestallt, datt déi Klacke vill ze deier wieren. An der Tëschenzäit war méi eng bëlleg Géisserei fonnt ginn, nämlech d'Firma Goussel Jeune vu Metz. Sou goufen déi zwou Klacken dunn 1863 fir 2.580,60 Frang der Rollenger Kierch verkaaft, nodeems do déi fréier Klack ee Rass kritt hat. Zesumme weien d'Klacke 561 kg.

Nr.	Numm	Duerchmiesser (cm)	Gewiicht (kg)	Toun	Géisser	Gossjoer
1	Antonius	88		g'	Nic. Jaclard	1862
2	Donatus	68		c"	Nic. Jaclard	1862

Literatur

Broschür: Renovatioun vun der Rollenger Poarkierch 1997-2000

Kuckt och

Lëscht vu reliéise Gebaier zu Lëtzebuerg

Um Spaweck

Commons: Kierch Rolleng (Péiteng) – Biller, Videoen oder Audiodateien