HIP 11915
Den HIP 11915 ass e Gielen Zwerg am Stärebild Cetus. Hie läit ronn 186 Liichtjoer vun eiser Sonn ewech. Hien huet bal déi selwecht Mass, Temperatur, a Metallizitéit souwéi e vergläichbaren Alter wéi eis Sonn an ass dofir e sougenannte Sonnenzwilling. 2015 gouf d'Entdeckung vun engem jupitergroussen Exoplanéit ëm dëse Stär publizéiert.
| HIP 11915 | |
 | |
| Stärebild: | Cetus (Cet)
|
| Daten (Equinoxe J2000.0) | |
| Rektaszensioun | 02h 33m 49,02495s |
| Deklinatioun | - 19° 36' 42,5032" |
| visuell Magnitude | 8,58 mag |
| Spektralklass: | G5V |
| Astrometrie | |
| Radialvitess: | 14,1 ± 0,5 km/s |
| Parallax: | ? |
| Distanz | 57,3 ± 3,5 PC |
| Liichtkraaft | ? mag |
| Physikalesch Eegenschaften | |
| Radius: | ? R☉ |
| Metallizitéit: | -0,059 ± 0,004 |
| Uewerflächentemperatur | 5.760 ± 4 K |
| Alter: | 4,0 ± 0,6 Milliarden |
| Aner Bezeechnungen | |
| Henry-Draper-Katalog | HD 16008 |
| Hipparcos-Katalog | HIP 11915 |
| 2MASS | J02334900-1936425 |
| SAO | SAO 148468 |
| Tycho-Katalog | TYC 5862/2032/1 |
De Stär ass mat enger visueller Hellegkeet vun 8,58 mag vill ze liichtschwaach, fir nach mat bloussem A gesinn ze ginn. Hie kann awer scho mat enger gudder Spektiv lokaliséiert ginn.
Planéitesystem änneren
Den HIP 11915 gehéiert zu enger Rei vu ronn 60 als "Sonnenzwilling" klasséiert Stären, déi zanter 2011 am Kader vun engem Sichprogramm fir Exoplanéiten ëm sou Stäre mam Échelle-Spektrograph HARPS vum Europäesche Südobservatoire (ESO) ënnersicht ginn. En internationaalt Astronomenteam ënner der Leedung vu brasilianesche Wëssenschaftler hunn am Juli 2015 den Noweis vun engem Planéit bekannt ginn, deen ëm den HIP 11915 kreest. D'Entdeckung gouf mat der Radialvitessmethod gemaach.
De Planéit mat der Bezeechnung HIP 11915 b huet no der Modellrechnung vum Entdeckerteam eng Mindestmass vu ronn 0,99 Jupitermassen, eng grouss Bunnhallefachs vu ronn 4,8 AE, an eng Ëmlafzäit vu ronn 3830 Deeg. De Planéit ka sou als Jupiterzwilling ugesi ginn, deen eng änlech Mass huet wéi de Jupiter am Sonnesystem a säin Zentralstär op enger änlecher Distanz ëmkreest, wéi de Jupiter d'Sonn.
D'Resultater vun de Radialvitessmiessunge schléissen d'Existenz vun engem weidere Gasris bannenzeg vun engem Ëmlafradius vun 1000 Deeg ëm den HIP 11915 aus, wat d'Méiglechkeet vu méi wäit bannenzeg ëmkreesenden terrestresche Planéiten opléisst. D'Planéitesystem vum HIP 11915 ass no enger Publikatioun vun der ESO e villverspriechende Kandidat fir e Planéitesystem änlech wéi eist Sonnesystem.
