Lëtzebuergesch: Vrum Krich hunn zu Réimech fënnef jüddesch Famille gewunnt. Dräizeng Mënsche vun hinne goufen ëmbruecht, nëmme fënnef hunn den Holocaust iwwerlieft - alleguerte ware si Affer deene bis dohi vun offizieller Säit net geduecht gouf. Dofir huet d'Stad Réimech als ofschléissend Aktioun am Kader vu "Mémoires communes - verfollegt, verdrängt, vergiess" de 24. Juni 2016 fir déi Doudeg siwwenzéng Stolpersteng vum däitsche Kënschtler Gunter Demnig verleeë gelooss.

D'Stad Réimech, de Buergermeeschter Henri Kox, d'Membere vum Schäffen- a Gemengerot an aacht Lokalassociatiounen hunn de Parrainage vun dëse Steng iwwerholl. Den nämmlechten Dag huet d'Gemeng dann och an Zesummenaarbecht mat der asbl MemoShoah Lëtzebuerg eng Plaz fir d'Affer vun der Shoah ageweit. Domat ass Réimech déi éischt Uertschaft am Land déi sou ausdrécklech hir fréier jüddesch Awunner éiert.

• D'Famill Marx-Nathan war an drëtter Generatioun zu Réimech an huet op Nummer 36 an der Rue Neuve gewunnt. De Felix Marx, 1875 zu Schwéidsbeng gebuer, war Véihändler a Versécherungsagent. Den 23. Abrëll 1942 gouf hien, zesumme mat senger Fra Emma, 1878 zu Gau-Algesheim an Däitschland gebuer, op Lublin an de Ghetto Izbica deportéiert. Béid goufen do, oder zu Bełżec oder Sobibor ëmbruecht. De Gaston, hire Jong war am Mee 1940, beim preiseschen Iwwerfall op Lëtzebuerg, a Frankräich geflücht an huet als eenzege vun hinnen den Holocaust iwwerlieft.

E grousse Merci un den Norbert Lindenlaub fir seng Recherchen zu den eenzelne Familljegeschichten.