Deutschland Tour

Dëse Sportsartikel ass eréischt just eng Skizz. Wann Dir méi iwwer dëst Theema wësst, sidd Dir häerzlech invitéiert, aus dëse puer Sätz e richtegen Artikel ze schreiwen. Wann Dir beim Schreiwen Hëllef braucht, da luusst bis an d'FAQ eran.

D'Deutschland Tour ass eng Etappecourse mam Vëlo déi an Däitschland gefuere gëtt.

Historique

Vum 21. bis de 27. Mee 1911 ass d'Course fir d'éischt gefuer ginn. Den Depart vun der Ettapecourse mam deemolegen Numm Quer durch Deutschland iwwer eng total Distanz vu 1.493 km war zu Breslau. D'Arrivée vun der sechster a leschter Etapp war zu Oochen. Organisateur war d'Allgemeine Radfahrer-Union déi vun der daïtscher Vëlosindustrie finanziell ënnerstëtzt gouf.

De Nicolas Frantz ass 1931 an där Course, déi dat Joer Internationale Opel-Deutschland-Rundfahrt geheescht huet, op déi drëtt Plaz komm.

1947, bei der éischter Oplo vun der Course nom Krich ass keen Tour an Etappe gefuer ginn. D'Grünes Band vom Rhein, wéi d'Course an deem Joer geheescht huet, war e Generalklassement dat aus sechs Kriteriume bestanen huet, déi an engem Zäitraum vu sechs Méint gefuer goufen. Et waren dat d'Kriteriume vu Solingen, Bonn, Düsseldorf, Köln, Oochen a Mönchengladbach.

Den Herrmann Schwartz huet et 1948, mat Hëllef vu Partner déi him fianziell an organisatoresch zur Säit stoungen, fäerdegbruecht erëm en Tour mat aacht Etappen op d'Been ze stellen. D'Course huet deemools d'Grüne Band der IRA (Interessengemeinschaft Radsport) geheescht. Nodeem d'Course ouni Ënnerbriechung all Joer vun 1948 bis 1952 gefuer gouf, war et mam Doud vum Herrmann Schwartz mat deem Kapitel op en Enn.

Duerno huet am Joer 1955 d'Zweeradfirma Fritz Wenk dofir gesuergt dat d'Course erëm gefuer géif ginn. Et ass awer bei der Première bliwwen.

Vun 1960 bis 1963 ass d'Internationale Afri-Cola Deutschland-Rundfahrt gefuer ginn.

No enger laanger Paus ass 1979 probéiert ginn d'Course erëm ze relancéieren an dat mat Hëllef vum Titelsponor Vitamalz. Déi éischt Oplo mam Numm Internationale Vitamalz-Rundfahrt war awer zu gläicher Zäit déi lescht.

Vun 1980 bis 1982 gouf d'Deutschland-Rundfahrt vun der Firma Sport Promotion G.m.b.H organiséiert. Nodeem déi Firma en Defizit vun 300.000 DEM (ronn 153.000 EUR) op der Lee hat, war et virleefeg eriwwer mat der Course.

En neien Ulaf ass 1998 geholl ginn andeems déi däitsch Vëlosfederatioun Bund Deutscher Radfahrer e. V. an d'hamburger Sportsfirma Upsolut Sports A.G. d'Firma Deutschland Tour G.m.b.H. gegrënnt ginn ass. Dës Firma huet als Zweck fir an Däitschland eng Etappecourse z'etabléieren an ofzewéckelen. Op déi Manéier goufen d'Virausetzunge geschaf fir d'Deutschland Tour, wéi d'Course zanter der Neioplo am Joer 1999 heescht, erëm all Joer ënner professionelle Bedéngungen z'organiséieren. Tourdirekter ass zanterhier de Kai Rapp, Direkter vun der Deutschland Tour GmbH.

Vun 2009 bis 2017 gouf den Tour op Äis geluecht. Haaptgrënn waren datt déi däitsch Tëleeschaînen ARD an ZDF d'Tour net live op der Tëlee wollte weise, an doduerch e ganze Koup u Recetten duerch Sponsoring ewechfalen.

Zanter 2018 gëtt d'Tour nees gefuer, Organisator ass d'Amaury Sport Organisation.

Den Andy Schleck beim Eenzelfuere géint d'Zäit den 8.8.2006 am "Deutschland Tour"

D'Gewënner

Internationale Deutschland-Rundfahrt

1937: Otto Weckerling	Däitschland
1938: Hermann Schild	Däitschland

Großdeutschlandfahrt, Deutschland-Rundfahrt für Berufsfahrer

1939: Georg Umbenhauer Däitschland

Das "Grüne Band vom Rhein"

1947: Erich Bautz Däitschland

Das "Grüne Band der IRA", kleine Deutschland-Rundfahrt

1948: Phillip Hilpert Däitschland

Das "Grüne Band der IRA", Quer durch Deutschland

1949: Harry Saager Däitschland

Deutschland-Rundfahrt

1950: Roger Gyselinck	Belsch
1951: Guido de Santi	Italien
1952: Isidore Derijck	Belsch
1955: Rudi Theißen	Däitschland

Internationale Afri-Cola Deutschland-Rundfahrt

1960: Albert Geldermans	Holland
1961: Friedhelm Fischerkeller	Däitschland
1962: Peter Post	Holland

Internationale Vitamalz-Rundfahrt

1979: Dietrich Thurau Däitschland

Deutschland-Rundfahrt

1980: Gregor Braun	Däitschland
1981: Silvano Contini	Italien
1982: Theo de Rooy	Holland

Deutschland Tour

1999: Jens Heppner	Däitschland
2000: David Plaza	Spuenien
2001: Alexander Vinokourov	Kasachstan
2002: Igor Gonzalez de Galdeano	Spuenien
2003: Michael Rogers	Australien
2004: Patrik Sinkewitz	Däitschland
2005: Levi Leipheimer	USA
2006: Jens Voigt	Däitschland
2007: Jens Voigt	Däitschland
2008: Linus Gerdemann	Däitschland
2009-2017 net gefuer.
2018: Matej Mohorič	Slowenien
2019: Jasper Stuyven	Belsch
2021: Nils Politt	Däitschland