Riesling

De Riesling ass eng wäiss Riefzort déi zu de wichtegsten a beschten Zorte vu wäissen Drauwe gehéiert; de Riesling gëtt och nach gär „Kinnek vun de Wäiner“ genannt.

Riesling

Ursprénglech kënnt de Riesling aus Däitschland wou en haut ronn e Véirel vun der Ubaufläch ausmécht; et gëtt do haaptsächlech am Rheingau a laanscht der däitscher Musel ugebaut. A Frankräich däerf de Riesling nëmmen am Elsass ugebaut ginn.

Eegenschaften

Aus dem Riesling gi gemenkerhand extra gutt Wäiner gemaach mat engem charakteristesche Bouquet; typesch Arome sinn Zitrusfriichten, Äppel an Akazien. Well dem Riesling seng Frëschheet a Saier konstant bleift, ass e gutt gëeegent fir Äiswäin oder eng Spéitlies ze maachen.

Lëtzebuerg

Op der Lëtzebuerger Musel sinn déi bescht Parzelle fir de Riesling reservéiert. D'Häng déi no Süden augeriicht si wou d'Sonn vill drop schéngt, erméiglechen et fir elegant an équilibréiert Wäiner ze maachen. De Riesling gëtt relativ spéit zeideg.

Zu Lëtzebuerg gouf de Riesling 2013 op enger Fläch vun 158,89 ha ugebaut, wat 12,27% vun der Ubaufläch ausmécht.

Kuckt och

• Wäibau

Literatur

• Rudi & Laurens Mauquoi, Luxemburger Wein - Vin luxembourgeois, Éditions Schortgen, Luxembourg 2012, ISBN 978-2-87953-158-8

Um Spaweck

Commons: Riesling – Biller, Videoen oder Audiodateien

• De Riesling (Weisser Riesling) op der Websäit vun der Forschungsanstalt Geisenheim (de)