Dräilännereck

En Dräilännereck ass dee geographesche Punkt, wou dräi Grenze vum selwechte Rang an domat och dräi gläichaarteg Territoiren (Staaten, Regiounen,...) openee stoussen.

E Schëld vum Lieu-dit um Dräilännereck bei Léiler

Lëtzebuergesch-belsch-franséischen Dräilännereck bei Rodange.

Lëtzebuergesch-däitsch-franséischen Dräilännereck un/an der Musel bei Schengen.

Lëtzebuergesch-belsch-däitschen Dräilännereck op der Our.

Fréiere belsch-lëtzebuergesch-preiseschen Dräilännereck op der Schmëdd, ëm 1910.

Fréieren Dräilännereck op der Schmëdd, 2010. Lénks d'Gossemaark LB286 riets déi stenge Maark LB75

D'Zuel vun den Dräilännerecken hänkt vun der Zuel vun den Noperen of, ma och dovun, wéi vill Miergrenzen do sinn.

Sou huet zum Beispill Éisträich 9 Dräilännerecken, Däitschland der 7, d'Schwäiz der 6 a Frankräich der 4. Lëtzebuerg huet der 3, Dänemark a Portugal dogéint keen eenzegen.

Lëtzebuerger Dräilännerecken haut (no 1919)

Plaz	Länner	bei den Uertschaften	Bemierkung
Dräilännereck bei Rodange	Belsch Frankräich Lëtzebuerg	Éibeng (Aubange) Mäertesbierg (Mont-Saint-Martin) Rodange
Dräilännereck bei Léiler	Belsch Däitschland Lëtzebuerg	Ouren Sevenig Léiler	D'Réibaach mécht d'Grenz tëscht der Belsch a Lëtzebuerg. Wéinst dem däitsch-lëtzebuergesche Kondominium gëtt et awer kee feste Punkt am Grenzfloss wou déi dräi Länner uneneestoussen. Theoreetesch läit en an der Mëtt vun der Our.
Dräilännereck bei Schengen	Frankräich Däitschland Lëtzebuerg	Opech (Apach) Perl Schengen	Wéinst dem däitsch-lëtzebuergesche Kondominium gëtt et awer kee feste Punkt am Grenzfloss wou déi dräi Länner uneneestoussen. Theoreetesch läit en an der Mëtt vun der Musel tëscht der Spëtzt vun der lénkser Ausfaartsmauer vun der Opecher Schleis an dem lëtzebuergeschen Uwänner.

Lëtzebuerger Dräilännerecke fréier (virun 1919)

Déi zwéin Dräilännerecken, déi Lëtzebuerg mat Däitschland huet, gëtt et sou, wéi mer se haut kennen, eréischt zanter 1919:

• Als Folleg vum Éischte Weltkrich goung Elsass-Loutrengen vun Däitschland hannescht u Frankräich. Virdru war den Dräilännereck mat Frankräich südlech vun Uewerkuer (do, wou haut d'Limite vun den Departementer Moselle a Meurthe-et-Moselle u Lëtzebuerg stéisst).
• Och op der Nordgrenz gouf et Ännerungen, wéi Territoirë vu Preisen un d'Belsch goungen. Virdru war den Dräilännereck op der Schmëdd (Koordinaten: 50° 10’ 58’’ N 06° 01’ 29’’ O).

Kuckt och

• Traité vu Versailles
• Dräilännereck bei Léiler
• Dräilännereck bei Schengen
• Dräilännereck bei Rodange
• Däitsch-Hollännesch-Belschen Dräilännereck um Vaalserberg tëscht Gemmenich (B), Vaals (NL), a Reinartzkehl, Oochen (D)

Um Spaweck

Commons: Dräilännerecken – Biller, Videoen oder Audiodateien

Commons: Dräilännerecke mat Lëtzebuerg – Biller, Videoen oder Audiodateien