Eng Demo, och nach Demotape genannt, ass am Musek- a Filmgeschäft eng Opnam, déi vu Museker oder Schauspiller aus Aarbechtsprouwen als Promotiounsmaterial zesummegestallt gëtt.

Eng Demotape vun engem schweedesche Museker

An der Musek ass eng Demo meescht eng reng Audioopnam vun engem op einfachem techneschen Niveau produzéierte Musekstéck. Bei engem Schauspiller setzt sech eng Demo aus Ausschnëtter vun zum Beispill Film- oder Fernseeproduktiounen zesummen, an deenen déi Persoun matgewierkt huet. Eng Demo gëtt also net opgeholl, fir verëffentlecht ze ginn; si déngt just als Referenz a soll, wéi den Numm et scho seet, dat musikalescht oder schauspillerescht Kënne vun der Persoun oder der Grupp demonstréieren. Als Presentatioun gëtt d'Demo dann u Kënschtleragencen, Film- oder Musekproduzenten, Organisateuren, Mediefirmen a Plackelabelen gescheckt oder am Internet publizéiert, fir de Leit en éischten Androck vun der Fäegkeeten, dem Stil oder der Zouuerdnung vun engem Kënschtler ze vermëttelen.